Nova stizunetta «3½ Hosenstore» a Glion

DA SUSI ROTHMUND / ANR

Vintage e Second Hand ein plaids ch’ins auda pli e pli savens e purtar vestgadira da secund maun sa esser top modern. Perquei ei il temps segiramein ideals per arver la nova stizunetta «3½ Hosenstore» cun rauba da secund maun el marcau vegl a Glion. L’avertura dalla stizun che pren encunter vestgadira da carschi ed affons per vender vinavon quella ha liug sonda, ils 14 da settember 2019 dallas 10.00–16.00. La stizunetta che vegn menada da Sonja Vinzens en engaschi voluntari sesanfla ella Gassa Steffan Gabriel 2 ed ei all’entschatta aviarta mintgamai l’emprema sonda dil meins dallas 09.00–16.00 ni tenor cunvegnientscha. Cun enzacons inserats ellas gasettas han ils iniziants dalla stizun – l’uniun Oronos – fatg attents all’avertura ed agl intent da quella nova purschida. «Ei ha gia dau bia reacziuns ordvart positivas ed jeu hai astgau prender encunter ina massa buna rauba», di Vinzens ch’ei vid las davosas preparativas avon l’avertura.

Vestgadira da secund maun

Ella ha gia sortiu e cavegliau in tschuat vestgadira d’affons en da tuttas grondezias, mo era termagls, cudischs e calzers ein d’anflar cheu. Tut quei vegn vendiu vinavon per prezis favoreivels. Tenor Vinzens duei la stizun numnadamein esser in liug nua che persunas cun pusseivladads finanzialas limitadas san vegnir senza stuer dar ora ina massa daners tier buna rauba. Ei dat era in cantun cun bellezia bategls fatgs caltschiel. «Quels havein nus survegniu d’ina dunna che fa bia e bugen caltschiel, igl ei tut niev e zun adattau per far in regal ad enzatgi», declara la menadra dalla stizun tut commuentada da tonta generusadad. Ella spera che la purschida vegni enconuschenta e biars portien ils buns battegls ch’ei vulan buca pli trer en ella stizunetta enstagl da fierer naven da quei che sa aunc ditg far plascher ad auters. La visiun dall’uniun seigi da saver arver cul temps semegliontas stizuns era en auters loghens. Che l’emprema stizun «3½ Hosenstore» ei gest vegnida aviarta a Glion ha da far cun Vinzens ch’habitescha a Surcasti ed ei en suprastonza dall’uniun Oronos ch’ei in’uniun internaziunala. Gia da giuvna eis ella adina puspei s’engaschada per projects ed uniuns cun intent communizeivel e di: «Tier quell’uniun hai jeu anflau persunas culs medems intents, nus festivein la diversitad dalla veta. Nossa finamira ei da midar communablamein e cun carezia il mund ed attribuir activamein al futur dil mund.»

En favur d’in spazi vital optimal

«Nus scaffin in futur el qual nos affons, tuts carstgauns, animals e plontas san viver ensemen en pasch, libertad e carezia», declara Vinzens. Mintgina e mintgin che sappi s’identificar cun las finamiras e visiuns dall’uniun sappi daventar commember dall’uniun Oronos. «Quei tut ha da far nuot cun religiun, sectas, partidas politicas ni da quei», ha la dunna che s’engascha bugen per la communitad puntuau. Ils commembers s’engaschan per la pasch ed organiseschan per quei intent festivals ed events sigl entir mund. Per exempel la fiasta dalla pasch da treis dis ad Aurach ell’Austria ni quest atun in viadi a Tschernobil tiels affons e plazs emblidai. «Nus visitein quels affons e fagein regals ad els», di Vinzens. L’uniun semetti era en per ina midada dalla schientscha e cunscienzia sil mund per che las resursas dil mund vegnien mantenidas e la veta vegni puspei egl equiliber. Bravamein ambiziusas finamiras? «Gie, quei ei ver. Nossa visiun ei ferma e gronda. Igl ei denton pusseivel da formar ed influenzar nossa veta ed ils eveniments mundials entras presenza e responsabladad. Quei ei pusseivel entras agir cun plascher e ventira, entras engrazeivladad e carezia», ei Vinzens perschuadida.

www.oronosverein.ch