Domat fa dieta campestra – el cor dalla Svizra

da claudio Willi / mc

Dietas campestras han ina liunga tradiziun ella vischnaunca da Domat. Aschia fa il parlament communal per disa viseta al liug d’origin dalla presidenta ni dil president dil cussegl da vischnaunca che vegnan era numnai «la pli aulta» ni «il pli ault» da Domat. Aschia ein ils politichers communals da Domat viagiai el decuors dils davos onns per exempel a Mustér (Cornelia Märchy-Caduff), a Trun (Alois Tomaschett), a Brinzauls (Silvia Bisculm Jörg) ni dil Rein giuadora en Turgovia ni viers Faveras/Wangs.

Sut il presidi d’Ursin Fetz, sez era burgheis da Domat, ein ils politichers stai sill’Alp Ranasca ed uonn ei la destinaziun da viadi puspei stada ina gada ella Bassa, a Dagmarsellen el cantun Lucerna, la patria dil president actual Daniel Meyer (pps).

Gia il tat Meyer era sedomiciliaus a Cuera nua ch’el ha scaffiu tec a tec la flurenta interpresa da Meyer’s Söhne SA nua che Daniel Meyer (31) funcziuna gia dapi 2014 sco commember dalla direcziun.

Viseta a Dagmarsellen

Dagmarsellen schai ella vallada dalla Wigger el cantun Lucerna ed appartegn al circuit electoral da Willisau. Cugl emprem da schaner 2006 ei Dagmarsellen seligiaus – per buca duvrar il plaid fusiun – culs vischinadis dad Uffikon e Bucher tier la «nova e ferma vischnaunca da Dagmarsellen». Il president communal Philipp Bucher (pld) ha buca munchentau da presentar als visitaders da Domat sia vischnaunca che schaigi per aschidadir «el cor dalla Svizra» ed hagi schizun certas semegliadetgnas cun Domat, silmeins quei che pertucca la surfatscha da rodund 24 kilometers quadrat. Il diember d’habitonts encuntercomi seigi cun 5500 in bienton pli bass. La vischnaunca da Dagmarsellen dispona era buca d’in parlament, anzi, la radunonza communala ch’ha liug per ordinari duas gadas ad onn. L’autoritad responsabla ei il cussegl communal che consista da tschun persunas e s’entaupa treis gadas il meins per ina sesida da miez gi e che vegn dirigida dil president communal. Ina tura atras ils stabiliments da scola renovai e tras la casa communala ha dau in’investa dall’nfrastructura dalla vischnaunca. Actualmein frequentan 550 scolars – ni rodund in dieschavel dils habitonts – la scola a Dagmarsellen, ina relaziun proporziunala cun Domat.

Grond svilup grazia alla 
favoreivla situaziun da traffic

Grazia alla favoreivla situaziun da traffic ein numerusas interpresas d’industria e mistregn s’etablidas a Dagmarsellen. Denter quellas s’auda era l’interpresa da transport Gallikers che’ha sia centrala el vitg vischin d’Altishofen e ch’ei era vegnida visitada dils hosps ord il Grischun. Il schef senior Peter Galliker ha dau in’interessanta survesta davart quella interpresa da famiglia ch’ha entschiet siu svilup rasant igl onn 1918 cun in menaschi da cavals. Oz occupa la tiarza generaziun dalla firma Galliker 2850 emploiai e dumbra varga melli camiuns. Igl ei in’interpresa da logistica internaziunala cun 18 sedias differentas en sis tiaras. Aschia procura era in center da repartiziun efficient dall’interpresa a Landquart che la clientella dallas valladas spatitschadas dil Grischun vegni furnida gi per gi da Landquart anora cul provediment da basa necessari. Dietas campestras porschan l’occasiun d’intensivar ils contacts denter ils parlamentaris, ein sentupadas enrihentas ed intermedieschan investas interessantas en ils pensums, ils problems e las sfidas dad autras vischnauncas ch’ein magari semeglionts ni era tut differents.