ELEGER

DA RITA CATHOMAS-BEARTH

Jau appartegna a la generaziun ch’aveva d’uffant betg d’eleger bler. I deva mo paucs termagls e tge che vegniva sin maisa da mangiar decideva la mamma. Ils onns 60 è succedida la gronda midada. Cun la revolta da la giuventetgna è sa midà il sa vestgir. Ils giuvens purtavan chavels lungs e las giuvnas minis e shorts. Tuttenina era tut pussaivel. La societad autoritara ha survegnì sfendaglias ed è ida en stgaglias. Fin cun spargnar, las perspectivas da lavur eran senza cunfins ed ins consumava fin che la bursa era vita. Ils onns 70 (guarda ideas ecologicas da Hans Stricker) han in pèr paucs cumenzà a far patratgs davart il consum e sias consequenzas. Ma anc ils onns 80 vegnivan ins ris or dals exponents dals purs, sch’ins discurriva d’ina agricultura biologica. Quai che sa chapescha oz da sez vegniva considerà sco utopic e nunrealisabel.

Oz cumenza la giuventetgna puspè ad ir sin las vias. Per mai in segn da resvegl e midada. Noss’economia vegn a stuair sa drizzar tenor il consum. Er sche las plazzas aviaticas n’han sentì nagina recessiun. L’onn proxim vegnani a sentir. Tuttas novas tendenzas dovran temp da sa sviluppar. Ma ellas sa muventan. Ils umans han en l’istorgia adina puspè mussà ch’els san s’adattar a novas necessitads ed enconuschientschas. Il motor il pli effizient è la giuventetgna. Sche lezza sa dasda succeda insatge. Pertge ella è bain infurmada ed ella ha la dinamica e la forza da pretender e da sa midar. Bleras e blers èn gia vidlonder d’eleger novas vias e da midar lur consum. Jau hai er cumenzà.

Redactura responsabla.