Constructiv e per la caussa

dad augustin beeli / anr

Sonda ein las commembras ed ils commembers separticipai alla dieschavla radunonza generala dall’uniun Pro Flem-Cassons. Negin ha giu gust da far fiasta en vesta allas enzennas da damonda ch’ei dat aunc pigl access niev all’Arena tectonica Sardona. Il davos da settember 2009 han adherents dalla pendiculara Naraus–Cassons fundau l’uniun Pro Flem-Cassons. Dapi lu ein diesch onns vargai e la planisaziun dalla colligiaziun da Flem cull’Arena tectonica Sardona s’entarda.

Avon quater onns han ins serrau definitivamein la pendiculara Naraus–Cassons, pilasters, suga e staziuns dalla cabina ein demontai e spazzai. Ni igl entusiassem ni igl engaschi permanent hagien saviu impedir la dira realitad, ha il president dall’uniun Pro Flem-Cassons, Arno Krucker, commentau sonda vargada.

Malgrad ch’il suveran da Flem ha decidiu il matg in credit da 20 milliuns francs per ina colligiaziun nova Flem–Nagens–Ils Cugns ei la situaziun malsegira. Krucker ha confirmau ch’il schef dalla gruppa Arena Alva, Reto Gurtner, vegli menar da niev la pendiculara sur Foppa tochen Nagens. «La nova idea d’integrar Foppa ella planisaziun da Cassons ei in avantatg per noss’uniun», ha il president Krucker puntuau.

Alla radunonza dalla Pro Flem Cassons ein ni representants dalla vischnaunca ni dall’organisaziun turistica ni dallas pendicularas stai presents.

Commentari e Pagina 3