Melli battegls e termagls

(anr/abc) Massa geniturs cun affons pigns e mesauns han ins entupau sonda avonmiezgi ell’aula dalla casa da scola a Laax. L’uniun da dunnas ha organisau per l’emprema gada ina buorsa d’artechels d’affons. «Bein, nus essan fetg cuntenzas cugl interess», concluda la presidenta dall’Uniun da dunnas da Laax, Seraina Cathomen. Sonda vargada ha quell’uniun organisau per l’emprema gada a Laax ina buorsa d’artechels d’affons. Vendergis sera havevan las mummas saviu purtar il resti ed ils artechels ch’ellas han vuliu dar vinavon. Mintga singul artechel ha denton stuiu ademplir certas normas da qualitad. La suprastonza haveva confidau a Milena Matter, commembra dall’uniun, il tgamun da quell’occurrenza.

Gia dapi in temps havevien ins giu endamen ch’ei fussi d’organisar ina tala occurrenza a Laax, ha la presidenta Cathomen raquintau. Cun Matter han ellas anflau ina dunna ch’enconuscheva igl andament e proceder. Duront treis meins ha il comite d’organisaziun preparau la buorsa d’artechels d’affons. Igl emprem han ins stuiu fixar in fegl cullas cundiziuns. Lu scriver ora e publicar baul avunda l’occurrenza. Ils geniturs ch’han vuliu dar vinavon resti ed artechels han stuiu s’annunziar. Els han stuiu risguardar las normas da qualitad, etichettar tut e fixar sezs ils prezis. En tut ein 35 geniturs respectiv mummas s’annunziai. Il vendergis sera ha il comite priu encunter la rauba e registrau mintga battegl. Otg dunnas ch’ein semessas a disposiziun sco gidontras han cavigliau e presentau la rauba sin 50 meisas tenor grondezia e gener. Era massa giugs e termagls, schizun battegls pli gronds sco maxi-cosys per pops pigns, skis, cundrezs da far schetg ed auter han midau maun duront la buorsa. «Massa buna rauba havein nus retschiert», ha Matter constatau. L’actuara dall’uniun e conorganisatura, Simona Camathias, puntuescha che l’uniun da dunnas hagi buca vuliu far fatschenta culla marscha da 20 pertschient ch’ella ha teniu anavos. Dils rodund 500 artechels ch’han midau maun sa l’Uniun da dunnas da Laax surdar ina biala summa all’organisaziun KiPaKi. Igl ei in’ovra caritativa dils club da servis Kiwanis Grischun e Part sura da Sogn Gagl. Serafin Beer, Bogn Ragaz/Tavanasa, presidiescha quell’organisaziun enteifer il club. Intent da KiPaKi eis ei da porscher sustegn ad affons malsauns e basignus ella regiun. Lydia Tschuor dil club Surselva fa part dalla suprastonza ed ei responsabla per la communicaziun.

Sco quei che la presidenta dall’Uniun da dunnas da Laax ha confirmau ein vestgadira ed artechels per la stagiun d’unviern stai el center dalla buorsa. Cathomen renda attent ch’ei detti primavera 2020 puspei ina tal’occurrenza cun accent sin vestgadira ed artechels per la stagiun caulda.