10% dals megliers restaurants
sa chattan en il Grischun

DA GION NUTEGN STGIER / ANR

La regiun ch’è in vair eldorado per gourmets è anc adina l’Engiadin’Ota. Però er la Sursevla s’avanza dad onn tar onn tar ina regiun cun bunas adressas per mangiabains. Nagin paradis per gourmets è alur Cuira. Dapi ier è il «Gault Millau» 2020 sin maisa. Suenter 37 onns cumpara quel adina a l’entschatta d’october, intginas emnas avant che la stagiun d’enviern entschaiva en il Grischun. Il «Gault Millau» è e resta la bibla per persunas cun in nas fin ed el è er quel guid nua ch’ils cuschiniers na vegnan betg mo ludads. Ils passa 40 experts han prendì 870 restaurants e lur cuschinunzs sut la marella per l’ediziun dal pli nov «Gault Millau». Tranter las 870 top adressas svizras per mangiabains derivan gist 81 dal Grischun. Remarcabel è bain che da quels 81 restaurants grischuns sa chattan gist 26 en l’Engiadin’Ota, be a San Murezzan èn quai 16 restaurants. Sin il mund datti strusch in flatg uschè pitschen cun tants restaurants da la classa superiura sco l’Engiadin’Ota. En quella chaussa è quella regiun davairas in mund per mangiabains.

Quatter cun 18 puncts

A la testa da la rangaziun grischuna è er quest onn Andreas Caminada dal restaurant «Schauenstein» a Farschno. El tutga en Svizra tar in da quels otg cuschiniers ch’han retschet dals experts 19 puncts per lur cuschina exquisita. Caminada è en il mund da la cuschina in vair star, da cumparegliar cun in star da pop ubain da rock. Gist trais restaurants grischuns han da nov 18 puncts e tutgan uschia er tar l’elita naziunala. Nagina surpraisa è segir ch’ils dus frars Enrico e Roberto Cerea han da nov puspè 18 puncts. L’enviern cuschinan els a San Murezzan en il «Da Vittorio» e la stad segnan els per la cuschina en il «Da Vittorio», lur agen restaurant, en la vischinanza da Bergamo. Da nov 18 puncts han er survegnì ils dus cuschiniers Mitja Birlo dal Silver a Val e Rolf Fliegauf da l’Ecco a Champfèr. Martin Delsass dal Talvo a Champfèr, el ha anc adina 18 puncts sco dapi intgins onns, cun simplamain na retschaiver quels 19 puncts ch’el vuless gia daditg.

Da nov 16 puncts per la Casa Tödi

Sis restaurants en noss chantun dastgan proximamain montar avant lur isch la tavla cun mintgamai 17 puncts «Gault Millau». Da nov tants puncts ha survegnì Tim Raue dal restaurant «The K» che sa chatta en l’hotel da luxus Kulm a San Murezzan. Vinavant 17 puncts ha er Dario Cadonau, el che maina cun sia dunna Tamara Cadonau cun bler cor l’hotel In Lain a Brail, in dals hotels singulars che nus avain en il Grischun. Gia dapi onns ina fitg buna adressa cun ina cuschina fina è la Casa Tödi a Trun. Manuel Reichenbach, el è il cuschinier ed ospitant e dapi ier ha el da nov 16 puncts «Gault Millau». El merita d’esser da nov tranter ils megliers cuschiniers grischuns, cun esser gugent cuschinier cun corp ed olma. In auter grond num tranter ils cuschiniers è Fabrizio Zanetti, il giuven schef-cuschinier da l’hotel da luxus Suvretta a San Murezzan. Da nov ha er el 16 puncts, quai ch’è lura er il cass per Sascha Meyer dal Mulania a Laax.

Ina gulp veglia

Finalmain han ils experts che prendan ils cuschiniers sut la marella chapì che Guido Sgier dal restaurant Postigliun ad Andiast tutga tar in dals megliers cuschiniers en Surselva. Da nov ha il Sursilvan, tranter ils cuschiniers ina gulp veglia, 15 puncts «Gault Millau» e dastga sa legrar da quella buna nova. Sgier è cunzunt enconuschent pervia da sias tratgas exquisitas da selvaschina, cun las qualas el ha sa fatg in num er sur ils cunfins grischuns. Da nov en la bibla per gourmets figurescha il restaurant Stüva Colani da Madulain. Paolo Casanova ha retschet dals experts 15 puncts. Novizs tranter ils restaurants cun puncts da «Gault Millau» èn er Il Siam a Flem, Das Elephant a Laax ed il Vista a Sagogn cun mintgamai 14 puncts. 13 puncts ha la Posta Veglia a Schluein ed è da nov en il guid per mangiabains. Andreas Baselgia dal restaurant Greina a Rabius, el ha da nov 13 puncts per sia buna cuschina.