Stabilitad malgrad unda verda

Da Martin Cabalzar

N ies sistem politic svizzer sebasa sin stabilitad e concordanza. El tscherca d’integrar las forzas politicas relevantas ella responsabladad guvernamentala. El evitescha aschia dirs cumbats e lutga permanenta denter regenza ed opposiziun. Tiaratriembels politics cun viultas radicalas e midadas frequentas da regenzas ed administraziuns ein perquei ton sco exclausas. Ins tscherca cumpromiss e consens, malgrad diversitads ideologicas. Quei ei buca spectacular, forsa schizun lungurus, probabel denton il recept da success e garant per cuntinuitad e stabilitad.

Las elecziuns dad ier demonstreschan denton era evidentamein che nies sistem politic ei tonaton aunc buns per enqual surpresa. Ils verds han registrau ina victoria historica, han uss 42 mandats el Cussegl naziunal e recloman perquei a mesa vesta ina sutga el Cussegl federal. En egl han els primarmein ils secund sez dils liberals. Malgrad las sperditas resta la pps cun 25,6% la pli gronda partida. Sil secund plaz suonda la ps cun 16,5% (-2,3%) e la pld cun 15,5% (-0,9%). Ils verds gudognan 5,9% e conquistan cun 13,0% il quart plaz, suandada dalla pcd cun 11,8% (10,2%) e dils verd-liberals cun 7,6% (+3,0%). La pbd piarda 1,7% e setschenta cun 2,4% alla cua. Quei ei per ella probabel il culp mortal sco partida naziunala. Motiv da selegrar da lur resultat han quella ga en scadin cass ils verds e las dunnas.

Era quella gada han las partidas fatg tut il pusseivel per mobilisar il suveran. Aunc mai ha quel giu tonta schelta d’eleger. E las campagnas vegnan adina pli liungas, intensivas e cuostan cunzun era adina dapli. Ei tonscha buca pli cun placats, inserats, podis, stans, souvenirs, recumandaziuns e contacts persunals. La preschientscha ellas reits socialas e la mobilisaziun al telefon han adina dapli muntada. Alla cuorta vegnan aschia il discurs tematic cuntravers ed il confrunt persunal e direct.

martin.cabalzar@somedia.ch