La mar litterara

Da Sandro Buchli / ANR

Trais dis vacanzas sper la mar. Quai tuna bain en inqual’ureglia. Ma la mar na giascha betg gist sper noss chantun muntagnard ed ha uschè er betg spontanamain plaz en noss calenders tgemblads da termins. Perquai pudais vus visitar la mar silmain sco lieu litterar e fantastic, quai durant ils Dis da litteratura che han lieu davent il 1. fin ils 3 da november 2019. Entginas uettas ord il program, tschentà ensemen dal quintett d’organisaziun Ralf Beer, Nadina Derungs, Sara F. Hermann, Sereina Nay e Natalia Tuor: Lantschà vegn il festival quest onn extra muros il venderdi saira en il cabinett dils visiunaris a Cuira. Gufo Reale preschentan ensemen cun Manuela Tuena lur program «MareMonti». Alura datti la pussaivladad da forsa baiver in Caipirinha e da sa sentir gist uschè sco sper la Copacabana.

La sonda, sco usità en Sala Tircal a Domat cumenzan preschentaziuns d’ediziuns, romans, lirica dad Uolf Candrian, Marilena Albin, Mevina Puorger, Tina Planta-Vital, Tim Krohn ni Annetta Ganzoni. Tge ch’ils Rumantschs pensan da la mar e dal amar en la musica ans quinta Laura Decurtins. Er ils uffants na vegnan betg a la curta: La dumengia preschentan Simona Demarmels e Jon Bischoff lur istorgia da fantasia. Sco min-tga onn datti era quest onn bleras preschentaziuns, prelecziuns, teater e discussiuns. L’entir program chattais en quista LQ.

Pagina 2