Aura dad aur alla fiera da Trin

(anr/abc) Sonda ei la populaziun da Trin s’entupada sin plaz cadruvi ed ellas streglias da Visut. La fiera dalla davosa sonda d’october ei stada d’in gi dad aur. Leu han els saviu ir da stan tier stan, sefermar e dar ina paterlada, ni era star pacific vid meisa cun in caffè ni ina ligiongia. Il gi dad aur cun temperatura emperneivla ha influenzau la fiera d’uonn. Buca meins che 52 stans da fiera ein uonn separticipai cun rauba e vivonda. Ins ha viu stans cun caussas da decorar ni da duvrar. Plirs marcadonts ein separticipai l’emprema gada a quella fiera locala. La fiera da Trin ei dapi varga 100 onns il termin da s’entupar dalla populaziun da Trin Vitg, Mulin e Digg. Per biars ch’ein carschi si a Trin eis ei occurrenzas che sveglian nostalgia e regurdientschas . Igl october a Trin ei cumbinaus cun dus usits: Las Muntinadas ein mintgamai l’emprema gievgia digl october e la fiera la davosa sonda digl october.

Alla fiera da Trin fuva oriundamein il puresser el center. Ils marcadonts e mulissiers vegnevan e cumpravan ensemen la buna biestga. Oz ei quei semidau cumpletamein, igl ei ina fiasta ora el liber cun stans ed ustrias. Auters marcadonts emprovan da vender lur rauba. Ella streglia pittoresca da Visut e sil plaz han privats ed uniuns puspei offeriu diltut, naven da cudischs, termagls e caussas d’artisanadi. Cun l’intenziun oriunda dalla fiera ein ils stans da vivonda aunc cumbinai empau. Ins ha saviu degustar e cumprar carn secca, raviuls empleni cun péra tosta, ei ha dau caschiel d’alp, paun casa e terscholas. Denter auter han ins era saviu degustar ligiongias da nuorsa e caura. Lu ha era l’uniun da caglioms offeriu il must dultsch e la petta cun péra da Trin.