Impurtonts giugs per Schluein Glion e Trun/Rabius

Da Hans Huonder / anr

Schluein Glion sco Trun/Rabius dattan lur davos giugs da quest atun ordeifer ed omisduas squadras fruntan sil davos dalla tabella. Per mantener la differenza da puncts culs davos plazzai vegnan omisduas equipas a stuer recaltgar puncts. Els davos quater giugs dil campiunadi dalla 2. ligia regiunala ha Schluein Glion recaltgau sulettamein in punct el remis encunter Altstätten. La davosa victoria datescha dalla fin da settember ordeifer encunter Ruggell. La terrada encunter Arbon la dumengia vargada ei bein stada disgrazieivla, mo la constataziun ch’ins havess saviu salvar in ni l’auter punct a Crap Gries mida nuot vid la situaziun.

Dumengia proxima ha l’equipa dil cautrenader Alessandro Giacomelli la caschun da recumpensar quella terrada. La squadra dalla Foppa ei numnadamein hosp da Rheineck. L’equipa songagliesa schai sil davos plaz cun tuttina biars puncts sco Romanshorn e sulettamein in punct retard sin Schluein Glion. Cun ina victoria savessen ils Sursilvans s’allontanar dalla cua dalla tabella e passentar igl unviern sin in plaz segirs dalla relegaziun, silmeins ad interim. Che l’equipa da Schluein Glion ha il potenzial da gudignar encunter pli u meins mintga squadra dalla gruppa 1 dalla 2. ligia regiunala ha ella mussau en differents giugs quest atun. Ins astga pia esser spanegiaus silla prestaziun dumengia proxima a Rheineck.

Trun/Rabius a Sargans

L’equipa da 3. ligia da Trun/Rabius ha mussau in bien campiunadi d’atun entochen uss e sonda suentermiezdi dat l’equipa dalla Cadi il davos giug. Sil program ei la scuntrada encunter il davos dalla tabella, Sargans. Ils Songaglies han tschun puncts dameins sin lur conto che Trun/Rabius. Cun prestaziuns semegliontas a quellas els davos giugs ha Trun/Rabius senz’auter la schanza da recaltgar puncts era a Sargans. Cun in ni forsa schizun treis puncts savess l’equipa da Donat Albin e Philippe Vincenz terminar l’emprema runda dil campiunadi cun in bien sentiment en vesta alla secunda runda la primavera vegnenta. Dils diesch giugs entochen uss ha Trun/Rabius spiars sulettamein quater. Sargans ha perencunter gudignau sulettamein in da diesch e leutier contonschiu quater puncts en remis.

Las equipas da 4. e 5. ligia sco era las pli biaras dils juniors, seniors e dallas damas han terminau lur campiunadi per quest atun. Il davos giug dattan ils juniors B dalla Surselva questa fin d’jamna. En quel ei la squadra dil trenader Claudio Bundi hosp a Kreuzlingen. L’equipa dil cantun Turgovia ha buca giu in bien atun ed ha spiars tuts diesch giugs d’entochen ussa. Per la selecziun sursilvana seporscha aschia la caschun da gudignar in ulteriur giug. Il secund plaz ella tabela – quei ch’ei in fetg grond success – ei gia segiraus.

Vaduz – Arbon so. 16.00

Rorschach – Ruggell so. 16.00

Mels – St. Margrethen so. 16.00

Romanshorn – Au-Berneck so. 17.15

Montlingen – Altstätten du. 14.00

Rheineck – Schluein Glion du. 15.00

Bogn Ragaz – Landquart ve. 19.30

Valposchiavo – Triesen so. 14.00

Sargans – Trun/Rabius so. 16.00

Triesenberg – Gams so. 17.00

Tusaun-Cazas so. 18.30

Domat – Buchs du. 15.00

Teufen – Brühl so. 15.00

Rheintal – Rorschach so. 15.00

Uzwil – Romanshorn so. 15.00

Glaruna – Tobel so 15.00

Kreuzlingen – Surselva so. 15.00

Amriswil – Winkeln so. 15.00

Domat b – Sargans so. 15.00

Vaz-sut – Schlarigna du. 14.00