Chantun ha stuì mazzar 145 chauras

En in grond manaschi en il Puschlav han stuì vegnir mazzadas e dismessas 145 chauras. Quai pervi da la malsogna paratuberculosa. Quai ha communitgà l’uffizi per la segirezza da victualias e per la sanadad d’animals. Dapi il mars da l’onn passà saja l’epidemia adina puspè vegnida diagnostitgada tar singuls animals dal manaschi. Sco ultima mesira ha l’uffizi decidì da mazzar tut las chauras. Tut en tut sajan crappadas en quest manaschi 210 chauras. Paratuberculosa è ina malsogna bacteriala che fa smagrir ils animals. Ell’è incurabla, dentant na sa derasa ella betg ferm. Perquai na saja in’ulteriura infecziun en la Val betg probabla.

La summa per la gulivaziun da finanzas tranter ils chantuns crescha per 61 milliuns francs sin stgars 5,3 milliardas. Il chantun Grischun survegn trais milliuns francs dapli che quest onn. Il pli bler paja Turitg ed il pli bler survegn Berna.

Il cussegl federal ha approvà la mesemna las summas per la gulivaziun da finanzas tranter ils chantuns da l’onn che vegn. En tut muntan quellas a 5,3 milliardas francs. Quai èn 61 milliuns francs dapli che quest onn.

Il Grischun survegn l’onn proxim definitivamain var 270 milliuns francs ord la gulivaziun da finanzas federala, quai èn trais milliuns francs dapli che quest onn. Il pli bler paja er l’onn che vegn il chantun Turitg cun stgars 520 milliuns francs en la gulivaziun. Quai èn var 30 milliuns dapli che quest onn. Il chantun Berna survegn er il 2020 il pli bler. Cun 1,1 milliardas francs èn quai dentant var 85 milliuns francs damain che quest onn.

Spezialmain s’augmentan l’auter onn ils pajaments en la gulivaziun da resursas nua ch’ils chantuns flaivels survegnan en total 4,3 milliardas francs. Quella summa vegn finanziada da la confederaziun per 60% e per 40% dals chantuns cun fermas resursas.