Musica populara sin l’orgla cun Thomas Riegler

Sin invitaziun dall’Associaziun catolica dad organistAs e dirigentAs dil Grischun (BVKOK) e dall’Associaziun reformada per orgla e cant ecclesiastic dil Grischun (VOGRA) han 12 participontAs interessai dau suatientscha al cuors cul tema «musica populara sin l’orgla» da Thomas Riegler da sonda, ils 2 da november 2019 ella baselgia dalla Crusch a Cuera.

Suenter il beinvegni entras la presidenta dalla Vogra engrazia il musicist Thomas Riegler per l’invitaziun. El selegri d’astgar menar per l’emprema gada en Svizra in cuors d’orgla. Il musicist ei naschius igl onn 1965 a Würzburg e carschius si a Wiesentheid en Unterfranken. El ha fatg il studi da musica da baselgia e da scolast da clavazin. Dapi igl onn 2001 ei Riegler engaschaus sco cantautur, scolast da clavazin e cumponist a Bad Neustadt. Cun sia dunna parta il musicist la plazza damai ch’era ella ei musicista da baselgia. Aschia hagi el pli bia temps per cumponer.

Cugl emprem toc musical ord siu cudisch «S(w)inget dem Herrn ein neues Lied» arva Riegler il di musicalmein cul toc dalla bein enconuschenta canzun Good Morning. Gia tier ils emprems tacts han ins saviu constatar ch’ei setracta da musica pretensiusa cun grondius effect. Beinduras humoristic, gagliard, «groovig» e neu dil ritmus fetg pretensius.

Lu suondan ord il medem cudisch: Open your heart, Come On, Peace-Boogie, Open-Door-Samba, Osterwalzer, It’s me, Love-Rag, Hep, per numnar entgins tocs ch’il menader dil cuors ha sunau cun ardiment veseivel. Il magister ha mintgamai dau ina cuort’explicaziun davart sia inspiraziun, il stil e la realisaziun dils tocs cumponi. La varietad dils tocs musicals ch’il cumponist ha mess en notas e sunau sin l’orgla, la regina dils instruments, ha impressiunau, tschaffau e fascinau nus. Ei seigi impurtont da mintgamai sedumandar a tgei occasiuns ch’ins sappi far diever dils tocs musicals. Per contonscher igl effect giavischau dil toc sto igl organist registrar tenor la situaziun acustica dalla baselgia.

En la secunda part dil cuors ha Riegler sunau ord il cudisch «Originelle Choralvorspiele für Gottesdienst und Konzert» beinenqual toc. Igl ei ina rimnada elaborada da preludis ed intonaziuns ord il cudisch da canzuns evangelic da tempra frestga, devoziusa e libramein naschida entras sia pratica dils survetschs en baselgia. Cheu ha il cumponist ina mischeida da tocs levs e grevs cun varietad stilistica.

Riegler ha publicau quater musicals e differentas canzuns d’affons, in cudisch da sprituals, divers canons, gospels, oravontut preludis da chorals ed intonaziuns tier novas canzuns ed era plirs cudischs cun musica da stuors.

Sco finiziun dil cuors ha il magister da u curascha a nus d’eleger tals tocs pli pretensius, exercitar ed experimentar senza retenientschas. Igl impurtont seigi d’haver plascher da far musica sco organistA.

En num da tuts participonts engraziel jeu a Thomas Riegler per las numerusas gideivlas ed interessantas inspiraziuns da sias cumposiziuns.

Informaziuns davart las purschidas saveis vus mirar sin www.bvkok.ch e www.vogra.ch

Jacinta Jacomet-Lombriser, actuara BVKOK