In’educaziun bilingua cun success

(cp) La Lia Rumantscha (LR) sa fatschenta en sias activitads cun la realitad bilingua da la gronda part da la populaziun rumantscha. I va per far attent als avantatgs ed a la plivalur da la bilinguitad. Savair discurrer dapli ch’ina lingua porta numerus avantatgs. Ins emprenda pli tgunsch autras linguas, ins dumogna meglier differentas situaziuns da communicaziun interculturalas, e forsa gidan cumpetenzas en pliras linguas schizunt cura ch’ins s’annunzia per ina plazza. Ma in’educaziun bilingua na gartegia betg adina senz’auter. Vitiers vegn in quità ch’ins auda regularmain en quest connex, numnadamain la dumonda schebain uffants na sajan betg surdumandads sch’els creschan si cun pliras linguas enina.

Per respunder a quella ed ad autras dumondas e per refutar dubis e resalvas organisescha la LR ensemen cun l’Uniun da scolina Cuira ina saira d’infurmaziun. L’occurrenza sa drizza a geniturs ed autras persunas responsablas per l’educaziun d’in ambient famigliar biling che vulan porscher a lur uffants in’educaziun ed ina furmaziun bilingua rumantsch-tudestga. Las finamiras èn da preschentar vias co ch’in’educaziun bilingua en famiglia po avair success, da sclerir a moda illustrativa ils avantatgs d’in’educaziun bilingua e da mussar las pussaivladads ch’i dat a Cuira en connex cun la furmaziun bilingua en rumantsch e tudestg. Da la partida vegnan ad esser Stefan Brülhart-Caprez, president da l’Uniun da scolina Cuira, represchentantas da la gruppa da gieu Rumantscholina, Flurina Plouda, responsabla per il program da kidsfits da la LR, e Conradin Klaiss, manader furmaziun LR. Els stattan gugent a disposiziun per dumondas ed impuls.