En dubi per l’accusà

(rtr) Avant in onn e mez è il plevon da Tujetsch vegnì en arrest d’inquisiziun, uss al valitescha la Dretgira regiunala sco innocent.

L’anteriur plevon da Tujetsch na vegn betg sentenzià pervi da violaziun e sforz sexual repetì. Sco la gasetta «Südostschweiz am Wochenende» scriva haja la Dretgira regiunala Surselva decis en dubi per l’accusà. Che la chaussa saja propi succedida sco descrit en l’acta d’accusaziun dubitescha la dretgira fermamain. In recurs è pussaivel. Tenor l’acta pertutgan ils fatgs sexuals ina relaziun dal plevon cun sia chasarina durant l’onn 2017.

La dumonda per indemnisaziun da satisfacziun da l’accusadra privata è vegnida renviada sin via civila e la dumonda d’indemnisaziun da process refusada. Il plevon obtegn ina satisfacziun da 4000 francs. Ils custs da procedura da total 45 000 francs van a quint dal chantun e da la cassa da dretgira.

La novitad ch’il plevon da Tujetsch è vegnì arrestà curt avant Tschuncaisma è stada ina surpraisa per la populaziun da Tujetsch. Ch’els n’èn betg vegnids orientads ord lur atgnas retschas, mabain da las medias da l’arrestaziun, ha fatg surstar il Tuatschins.