Producziuns libras per solists 
ed ensembles a Müstair

(anr/afi) Musicantas, musicants, trais experts ed il public han pudü giodair in sonda passada diversas producziuns musicalas. In chasa da scoula da Müstair s’han inscuntrats 27 solistas e solists e set ensembles per las producziuns libras per solists ed ensembles, organisadas da l’Uniun da musica dal district 1 e da la Musica Concordia Müstair. Il grond interess da vart da musicantas e musicants in tuot las etats demuossa cha l’Uniun da musica dal district 1 es cun seis intent e sia filosofia per quist arrandschamaint, sco chi para, sülla dretta via. La particularità da l’occurrenza, chi ha gnü lö ingon per la 12avla jada, es chi nu vain sunà per puncts e per üna buna rangaziun. Mincha solista, solist e mincha ensemble survain sper il rapport dals experts eir la pussibiltà d’ün discuors cun ün da quels trais. Numerusas scolaras e blers scolars da las scoulas da musica d’Engiadina Bassa Val Müstair e da l’Engiadin’Ota han profità da quist’occurrenza. La gronda part dad els as parteciparà prosmamaing a la concurrenza chantunala da solists ed ensembles a Cuoira.