Per la giuventetna e tranter staschung

da Peder Antona Baltermia

Ena gruppa libra tgi vot davantar en’uniun less dar en gnoul daple veta agl turissem d’anviern. Zont chel taimp da tranterstaschung tgi marscha pi pac. Chegl vottan els far cun en camp da neiv. Da curt on els sa preschento. I seian anturn 30 commembers tgi vegian musso interess. U migler detg interessents, perchegl tgi commembers ins so betg anc esser, essend tgi l’uniun n’è betg anc fundada. Glindesde seira dalla preschentaziun ainten la tga pravenda a Parsonz èn betg gist rivos tants, ma chels èn stos fitg mutivos. Ed ainten la tgesa pravenda a Parsonz è la preschentaziun er betg stada casuala, perchegl tgi chella è igl cutier digl amprem camp da neiv tgi è previa digls 6 anfignen igls 10 da schaner 2020.

Ensatge pigls giovens

Adrian Ballat, cuniniziant e savens motor cura tgi vo per tals projects an connex cun activitads dalla giuventetna, ò declaro l’ideia. An amprema lengia ins viglia porscher ensatge per la generaziun pi giovna. Chest’eda, betg scu tar Favogn Surses, pigls indigens, mabagn pigls giasts. E chegl per chels pi giovens. La vigliadetna n’è betg fixada, ma els painsan uscheia circa da 18–35. Cun giovens scolasts da skis tgi èn a madem mument er guids da chel camp da neiv ins less passantar en pêr deis ampernevels, analog a surf camps tgi ins canoscha pi tgunsch, damais en camp ainten la neiv. Ins passainta chels deis cun diversas activitads sportivas ed otras. Uscheia lessan igls guids mussar la regiun muntagnarda an general agls participants, alloura naturalmaintg er las pistas, seia chegl cun skis u cun l’essa. Seia chegl cun scliviglier sen la muntogna da glatsch, cun far cursa lunga u scusalar. «Nous lessans er dar bungs tips agls participants tge tgi ins catta noua ainten la regiun. Nous lessans eir cun els a visitar igls noss ameis tgi èn ensanouas aint igl territori da skis u giu la val. I dat er la pussebladad da piglier invista d’en trenadi mental e betg mantger aint igl camp da neiv dastga er tot chegl anturn la scena dad après ski ed ia sper er tgi detta las seiras l’egna u l’otra bela party», ò managea Ballat. Ins viglia er betg far en program fix noua tgi mintg’oura e mintg’activitad seia organisada, mabagn viglia esser flexibel ed er lascher giavischier e decider en tant igls participants. I geia veiramaintg per passantar en pêr bels deis ansemen.

Per amprova ossa dus camps

Igl amprem camp cun cutier ainten la tgesa pravenda a Parsonz noua tgi igls participants vignan retschets e tgiros da Florence Ursprung antscheva damais l’emda siva las vacanzas sur las Festas. Numnadamaintg igls 6–10 da schaner. Gl’è er pussebel da neir pir igls 8 da schaner anfignen igls 10. Ins organisescha chels camps sapientivamaintg chel taimp tgi è betg gist tant travagl. Uscheia tgi gl’è er en po daple plaz sen las pistas ed ansomma. Chel taimp son neir principalmaintg giovens tgi on betg famiglia ed èn betg dependents dallas vacanzas da scola.

Igl sagond camp è alloura digls 16 anfignen igls 20 da mars. Er en taimp noua tgi gl’è gio puspe en po pi quiet. Lò on igls participants cutier aint igl hotel Pianta a Savognin.

Ins viglia ossa antschever eneda cun dus camps e vurdar tge resung tgi chegl catta. Igl domber minimal da participants per realisar en camp ins ò fixo sen set. Chesta nova purscheida per giuvenils duess er esser aint igl prietsch en po adattada allas relaziuns finanzialas dalla giuventetna. Uscheia costa igl camp digl schaner per l’antier’emda 621 francs e per treis deis 358 francs. Cò è inclus star sur notg cun ansolver, igl pass da skis, transports etc. Igl camp digls 16 anfignen igls 20 da mars costa 701 francs e per treis deis 408 francs. Separo vetiers niss igl equipamaint da skis. Cò ins vegia er vurdo da survagneir prietschs favorevels cugls partenaris. Partenaris seian p. ex. la scola da skis, divers hotels ed igls affars da sport.

Ins è da buna speranza

Tar chests camps da neiv sa tractigl damais dad en’amprova. Chest onn cun dus camps e schi la dumonda vess dad esser bunga ins cuntinuescha gugent. Cun daples camps ed er cun adattar la purscheida tenor igls giaveischs ed igls basigns digls participants. Pero adegna vurdond dad organisar els durant chel taimp da tranterstaschung. I duess esser ena purscheida supplementara per la destinaziun. Gist per la generaziun giovna. «Nous speragn er tgi detta bungs contacts cugls indigens e tgi possa dar relaziuns stablas. Vot deir tgi igls madems turnan adegna puspe. Cugl «Snow Camp Surses» ischans preschaints segls canals digitals, uscheia ins survign las infurmaziuns sen la homepage «www.snow-camp-surses.business». Nous vagn betg an senn da far gronda reclama, ma speragn an amprema lengia tgi igls participants seian igls multiplicatours cun la reclama a bucca», èn igls iniziants dall’ideia.

Cun esser igls camps betg angal fixos sen activitads sen pista ins è er betg schi dependent dall’ora. Ed i vo er betg per activitads da sport ambiziousas, mabagn an amprema lengia pigl plascheir ed igl gaudi tranter la giuventetna.

Glindesde seira a Parsonz on igls iniziants fatg en viva sen ena bunga antschatta ed en bung gartetg per chest nov project.