La crusch cull’amur e cul celibat?

Da Hans Huonder / anr

En siu temps sco spiritual ha Marcel Köhle empriu d’enconuscher ina dunna e la relaziun cun quella ei daventada pli e pli profunda. El ei la finfinala sedecidius per ella ed ha bandunau la pleiv da Breil. Leu sco era ad Andiast, Dardin e Danis-Tavanasa ha el pastorau rodund treis onns. Il fenadur 2018 ha el allura communicau la decisiun da bandunar la pleiv. El film «La crusch cun l’amur» dad RTR che vegn mussaus dumengia sera di Marcel Köhle: «Cura ch’jeu haiel fatg la midada da Turitg si Breil era quella relaziun cun mia partenaria per mei sco finida. Lu ei il contact denton puspei sedaus. Cul temps haiel jeu detg: Enzaco drovi ina decisiun schubra. Schuber el senn ch’jeu saiel buca pli far vinavon quella veta dubla.» El film dalla redactura Bertilla Giossi s’exprima Köhle en ina moda fetg aviarta davart quei temps duront la veta dubla, mo era suenter. El relata da ses sentiments, sia rolla sco spiritual, mo era sco partenari da veta d’ina dunna. Köhle tematisescha denton era il celibat e la petiziun che Florentina Camartin ha priu en quei connex: «Las rodas mulin dalla baselgia molan ualti plaun. Pertuccont il celibat vegn ei buc a semidar bia ils proxims decennis.» Malgrad tut ei la relaziun da Köhle tier la baselgia restada. El hagi il basegns da visitar ils survetschs divins. Suenter haver bandunau la pleiv da Breil seigi quei stau empau pli grev ch’ussa. Il film vegn mussaus dumengia sera els Cuntrasts sin SRF1.

Pagina 3