I dat schizont «nozzas da tschivigliuns»

DA GION NUTEGN STGIER / ANR

Nozzas d’argient, nozzas dad ôr e nozzas da diamant, chels giubileums cunaschainsa. I dat alloura er anc blers oters giubileums da nozzas, tot tenor onns tg’en pêr è marido. Chel artetgel totga daveiras tar la rubrica «baitem e tschantscherlem». L’emda passada vainsa rapporto dallas nozzas da diamant da Rosalia ed Adolf Schmücker-Wasescha da Savognin. Cun eir alla tschertga schi dess daples infurmaziuns da chel giubileum da 60 onns esser marido è neida notiers segls meds digitals ena glista cun anc blers giubileums da nozzas e vetiers er igls noms da chels giubileums. Quant serious tgi chels noms èn è migler da betg commentar e remartger, divertents èn els tuttegna. Giubileums da nozzas vignan festivos segl antier mond, cunzont igls giubileums da 25 onns, 50 onns, 60 onns, e cun excepziun er chels da 70 onns esser marido.

Igls amprems diesch onns

La nozza sezza vign numnada «nozza verda». Igl simbol da chella èn las figlias verdas digl cranz dalla spousa. Numnada vign ella er «nozza da palpieri», pero er sch’en pêr è en onn marido, cun esser la lètg schi fegna scu palpieri. «Nozzas da mangola» ins ò cun esser dus onns marido, cun treis onns èn chegl las «nozzas da tgirom» ed alla lètg da quatter onns ins dei las «nozzas da seida». Esser en onn pi dei sot tetg ins nomna las «nozzas da lenn», cun seis onns èn chegl las «nozzas da zegn» e schinavant tg’ena lètg cozza set onns dastga igl pêr festivar las «nozzas da rom». Esser otg onns marido èn las «nozzas da tola», tar nov onns maridaglia èn chegl las «nozzas da cheramica» e diesch onns esser cun la madema donna marido è identic cun las «nozzas da rosas».

«Nozzas da cristal»

Esser marido 11 onns vign er numno las «nozzas da fier» e «nozzas da peterschegl» nomnigl igl giubileum da 12 onns marido. En on daple èn chegl las «nozzas da cristal» e cun esser 20 onns fidevel alla donna ins festivescha cun ella las «nozzas da porcellana». Tar 22 onns marido èn chegl las «nozzas da bronz» e cun esser 28 onns anc adegna inamuro ins dei tg’igl pêr vegia «nozzas da neglas» Sch’ins è 30 onns marido ins dei «nozzas da cural», bagn en bel giubileum cun en bel nom.

40 onns marido: «nozzas da rubin»

Dastga en pêr vurdar anavos sen 32 onns fidevladad, alloura èn chegl las «nozzas da savung». Esser en onn pi dei marido ins discorra dallas «nozzas d’âgl». Chel nom para ansomma da betg esser schi en bel, er schi agl pêr gosta eventual igl âgl. 38 onns marido = «nozzas da fi» e 39 onns marido = «nozzas da suglegl». Cun 40 onns esser en pêr ventirevel ins festivescha las «nozzas da rubin», bagn en giubileum tgi fò onour agl nom da nozzas.

Dallas «nozzas d’ogna» anfignen 
tar las «nozzas dad ôr»

Cun esser 41 onns marido dastgan om e donna festivar las «nozzas d’ogna» e cun 43 onns èn chegl las «nozzas da plom». En onn pi dei esser marido, alloura èn chegl las «nozzas da steilas». Igl giubileum da 45 onns vign numno «nozzas da messing» e sch’en pêr è dus onns daple marido èn chegl las «nozzas da lavendel». Egn digls giubileums tgi vign festivo igl pi stagn èn bagn las «nozzas dad ôr» noua tgi om e donna èn 50 onns en pêr ventirevel. Stat en pêr sang e dastga festivar igl giubileum da 55 onns marido èn chegl las «nozzas da platin» u er las «nozzas da giuvel».

Schizont «nozzas celestialas»

Cun esser 60 onns marido savainsa tgi chel giubileum vign numno «nozzas da diamant». Cun esser 65 onns en pêr ins discorra dallas «nozzas da fier». En onn pi dei marido vign detg «nozzas da tschivigliuns», bagn igl pi singular nom per en giubileum da 66 onns esser marido. Dastga en pêr festivar igl giubileum da 67 onns esser fidevel ins sainta savens tgi chegl seian las «nozzas da crap». Cun 70 onns esser marido ins raschunga dallas «nozzas da graztga». Chegl ò la sia raschung cun betg aveir mintga pêr chella graztga da pudeir festivar chel giubileum da 70 onns parteir mintga de igl bel ed er igl manc bel. Cun esser 80 onns marido ins festivess las «nozzas da rover» e tschintg onns pi tard fissan chegl las «nozzas digls anghels». Anfignen ossa ògl angal do en pêr segl antier mond tg’è sto 100 onns marido e chegl aint igl stadi Aserbaidschan. Igl spous è mort cun 126 onns e la sia donna cun 116 onns. El ed ella on dastgea festivar cun chel giubileum da 100 onns las «nozzas celestialas». Stimadas lectouras, stimos lectours, viglias betg piglier chel artetgel schi serious, mabagn pitost reir surlonder e sa diverteir da chels noms da nozzas plagn fantascheia, illusiun e stibgeida.