«Noss chantun ha anc bleras ulteriuras valurs»

DA GION NUTEGN STGIER / ANR

Tema central da la dieta da la marca «Grischun» dad ier a Cazas è stada la regiunalitad sco avantatg dal lieu. L’occurrenza è stada sut il motto «brutal local». A pled è er vegnì cusseglier guvernativ Marcus Caduff. Sa participadas a la dieta a Cazas èn 130 persunas dal turissem, da l’economia, da la politica e da la cultura. Discurri e referì è vegnì tar ils temas midada dal clima, persistenza, innovaziun e regiunalitad. Gist quels temas sajan er d’attribuir al Grischun sco «metorpola da la natira da las Alps», è vegnì ditg.

Gia ses post fix

Persunas dal rom, umens e dunnas che s’occupeschan bunamain mintga di cun quellas tematicas han tegnì referats co avair a lunga vista avantatgs cun promover il daletg e consum regiunal, integrar quel en la reclama e la fiera e sa differenziar dad autras regiuns. Daletg, culinaric e regiunalitad, trais aspects che van bain a pèr cun il Grischun. Tranter auter èn sa drizzads als participants ed a las participantas da la dieta la hoteliera Claudia Züllig, il pastur e coach per nutriment Adrian Hirt, Christoph Dietler, agronom e Kaspar Howald, il directur da Valposchiavo Turismo. La dunna ed er ils trais umens èn stads da l’opiniun che la regiunalitad haja gia ses post fix en la gastronomia ed er en il turissem, però saja anc avant maun in grond potenzial.

Daletg e culinaric

Manà tras il program e discurri cun referents e referentas ha Gieri Spescha, il mainagestiun da la marca «Grischun». Beneventada è la raspada vegnida da Francisca Obrecht, ella che stat a la testa dal cussegl da quell’organisaziun da promoziun. Ella ha ditg che regiunalitad saja: testa, cor e daletg. A Cazas è lura betg mo vegnì discurrì dal daletg culinar, mabain han tuts er giudì singulas tratgas singularas cun products regiunals da differents ospitants e purs da Bravuogn, Cuira, Filisur, Pasqual e Lavin.

Auta qualitad da viver

Discurrì ha Spescha er cun cusseglier guvernativ Marcus Caduff, el che maina il departament da l’economia publica. El ha ditg ch’il Grischun haja in pau daplis valurs che be turissem, natira, regiun per far vacanzas e giudair. En cumbinaziun cun il Grischun vegnia a blers be endament far vacanzas ed avair liber, ha ditg il cusseglier guvernativ lumnezian. Noss chantun saja er in paradis da la cultura ed il Grischun haja bleras ed innovativas interpresas cun in renum internaziunal. Ultra da quai saja il Grischun er in chantun per lavurar, ina regiun per abitar ed er ina cuntrada cun ina fitg auta qualitad da viver.

Tradiziun e moderna

Marcus Caduff ha ditg ch’il Grischun stettia bain er per tradiziun, dentant manchia er na la moderna. El è er da l’avis che cun la marca «Grischun» ins saja sin la dretga via e cunzunt cun metter adina dapli paisa sin la marca «daletg». Il schef dal departament da l’economia publica è er pertschert che be la via cuminaivla saja la dretga gist quai che pertutgia il turissem. Ina sfida saja en l’avegnir per il Grischun e per tut ils blers e buns manaschis da chattar persunal spezialisà.

Sia filosofia

Ina referenta che conuscha ils products regiunals, che promova quels e cuschina er quels è Rebecca Clopath, la cuschiniera e pura da Lohn. Suenter avair fatg experientschas professiunalas en plirs lieus haja ella vulì turnar enavos tar sias ragischs. En ses bain puril da bio «Taratsch» produtgescha ella bunamain tut quai che vegn tar ella en la padella e sin il taglier. La sia filosofia saja in taratsch viv, animals robusts e products sincers ed autentics. Ses giasts e clients vulan savair dapli da producziun, utilisaziun e consumaziun dals products ch’ella haja en ses iert ed en ses bain puril.