Prix Benevol 2019 va a «Tür auf – mo vinavon»

(mc) La fundaziun ecumena «Tür auf – mo vinavon» ha survegnì il Prix Benevol Grischun 2019. L’intenziun primara da l’organisaziun ecumena «Tür auf – mo vinavon» è da stgaffir pussaivladads da scuntrada en la Cadi. La fundaziun «Tür auf – mo vinavon» è vegnida fundada l’onn 1991 e vegn purtada da la baselgia refurmada e da la baselgia catolica sco er da las vischnancas politicas da la Cadi. Cun organisar occurrenzas e realisar projects en il sectur socio-cultural promova l’organisaziun scuntradas per meglierar la communicaziun, la convivenza e la chapientscha vicendaivla tranter giuven e vegl, indigens ed esters, catolics e refurmads e persunas d’autras confessiuns e religiuns. La fundaziun saja activa dapi 28 onns e sustegnia divers projects nua ch’i vegnia s’engaschà sin basa voluntara, uschia argumentescha la schuria la surdada dal Prix Benevol Grischun 2019 a «Tür auf – mo vinavon». Tranter auter èn la canorta d’uffants Lumpazi a Mustér, la lavur da Giuventetgna Cadi, ils champs d’uffants e giuvenils Cadi sco er il project Mbara Ozioma a favur da projects da svilup en Nigeria projects che vegnan purtads da la fundaziun.

Cun il Prix Benevol vul il post spezialisà per lavur voluntara Benevol dal Grischun far attent e render pli enconuschents la lavur voluntara e projects d’uniuns e privats. Il Prix Benevol vegn surdà en divers chantuns. En il chantun Grischun è il premi vegnì surda quest onn per la 5avla giada.

Premis da reconuschientscha

La Fundaziun Benevol Grischun ha plinavant era surdà trais premis da renconuschientscha en las spartas sport, sanadad e bainstar social e cultura e furmaziun dal temp liber.

En la sparta sport è vegnì undrà il Club da patins da Cuira. Quel è vegnì fundà l’onn 1921. El tgira passa 180 patinistas e patinists – da la principianta fin al sportist da prestaziun. L’october vegn mintgamai realisà il Cup Montalin che vala sco Cup svizzer. L’advent ha lieu il patinadi artistic da parada sin la Quaderwiese nua che tut las patinistas e tut ils patinists pon mussar lur abilitads ad in grond public.

Il Premi da renconuschientscha en il sectur sanadad e bainstar social è i a la VASK Grischun. Quai è l’Associaziun grischuna dals confamigliars da persunas cun schizofrenia e cun disturbis psichics (VASK). Ella s’engascha per ils problems e per ils quitads dals confamigliars e da las persunas pertutgadas.

L’associaziun festivescha quest onn ses giubileum da 30 onns. L’atelier da scuntrada a la Sennhofstrasse 11 a Cuira sco lieu d’inscunter exista gia dapi 20 onns. Seminaris d’in di, il telefon da contact, purschidas creativas e bler auter pli vegnan mess a disposiziun da l’associaziun VASK che vegn purtada exclusivamain da persunas che lavuran sin basa voluntara e senza indemnisaziun.

En la categoria cultura, furmaziun e temp liber va il premi a la Musica da giuvenils da Cuira. Quella exista dapi 75 onns. Ella promova l’emprender a sunar in instrument e pussibilitescha da far musica da cuminanza e sut cundiziuns favuraivlas. L’accumpagnament musical dal di dad ir ad acla da Cuira, il rimnar palpiri vegl sco er ulteriuras preschentaziuns ed activitads promovan la conscienza da l’atgna valur ed il sentiment da cuminanza tar ils uffants ed ils giuvenils.

Stans d’infurmaziun 
davart la lavur voluntara

Suenter la surdada dals premis èn las organisaziuns e las uniuns, che lavuran per part u dal tuttafatg cun voluntarias e voluntaris, sa preschentadas cun stans d’infurmaziun al public interessà. Quest’exposiziun ha mussà ina giada dapli quant varià che l’engaschament voluntar è en il Grischun. En tut ils secturs pussaivels da la vita è la lavur voluntara indispensabla. Ella tegna ensemen la societad e creescha ina plivalur nunpajabla per la convivenza da la populaziun.

Il cusseglier guvernativ Peter Peyer ha purtà il salid da la regenza dal chantun Grischun. Per il program accumpagnant han procurà gruppas da streetdance da roundabout Grischun. Las numerusas gruppas da saut ch’i dat en il Grischun stattan er sut direcziun da manadras voluntaras.