A Siat, 
tier siat famiglias

(anr/abc) L’jamna vargada ei Sontgaclau staus sin via e plazs. Denter auter era a Siat. Semegliont sco en auters vitgs tgira l’uniun da giuventetgna en quei vitg la tradiziun da visitar las famiglias cun affons. Ellas regiuns periferas da muntogna eis ei gnanc aschi sempel pli da mantener igl usit. Perquei ch’ils affons mauncan, famiglias cun affons ein scartas. Era a Siat ein la structuras demograficas semidadas cumpletamein ils davos decennis. Malgrad ch’il cantun ha slargau la via da colligiaziun ei il diember d’habitonts sereducius marcantamein. Dapi paucs onns constatesch’ins denton puspei ina leva cuntertendenza. Buca mo ils hosps da vacanzas che cumpran casas e habitaziuns apprezieschan da viver el vitget sulegliv, contonschibels idealmein cun traffic public e buna infrastructura. Quei han Sontgaclau e sia fumeglia era remarcau sonda vargada. Igl ei ina legra constellaziun ch’el ha saviu visitar uonn a Siat siat famiglias cun affons. Igl usit da Sontgaclau ha entschiet sil plaz avon l’ustria Surselva cun in aperitiv. L’uniun da giuventetgna ha offeriu vin cauld e punsch alla populaziun, igl ei stau ina caschun da s’entupar e guder ils contacts. Ils pigns han giu plascher da veser ils asens da Sontgaclau che fuvan semtgai en in claus. Silsuenter ha la gruppa entschiet las visetas tier las siat famiglias.