«Project Mariastein 2025»

(anr/gc) Alla fin d’uost 2018 ei «Il project Mariastein 2025» vegnius presentaus. La finamira ei «da far fit» la claustra benedictina da Mariastein per igl avegnir a pro da biars. Quella secatta sin intschess dalla vischnaunca da Metzerlen el cantun Soloturn. Oz cumpeglia il convent 17 muntgs – ella vegliadetgna media da varga 70 onns – cun avat Peter von Sury. Mariastein ei in enconuschent liug da pelegrinadi. Ca. 250 000 persunas pelegrineschien leu onn per onn. Igl entir cumplex e contuorn claustral ei era territori da recuvrada per il marcau da Basilea e las regiuns circumdontas dalla Frontscha e Tiaratudestga.

La claustra benedictina da Mariastein duei daventar in center d’oraziun, cultura, sentupada e recuvrada per tgierp, spért ed olma. Ins vegn perquei buc ad investir primarmein en edifecis e baghetgs, mobein cun cuntinuar, approfundar e drizzar en da niev enzatgei vegl, restont e fetg actual. Il motiv empalont secloma «Aufbruch ins Weite».

Dapi l’entschatta d’uonn ei Mariano Tschuor, Laax/Mariastein, engaschaus en pensum parzial sco menader dil «Project Mariastein 2025». El ha dad eruir ed elaborar basa e premissas structuralas, organisatoricas, persunalas e finanzialas per realisar a media ed a liunga vesta las vastas finamiras dil project. Era eis el responsabels per la communicaziun interna ed externa ed ha da recaltgar ils mieds necessaris (fundraising). Igl intent ei da descargar a liunga vesta la cuminonza claustrala e slargar la basa purtadra. Ins quenta cun cuosts da 18 milliuns francs.

La cuminonza claustrala po buca purtar persula quei grond buordi finanzial ed ei pia dependenta d’agid d’anoviars. 1970 ei l’uniun «Amitgs dalla claustra da Mariastein» seformada. Quella ha ca. 2300 commembers e gia dau summas considerablas per renovar e realisar impurtonts edifezis. Dapi quest atun exista era in comite da patrunadi cun persunalitads ord la Svizra dil nordvest e digl exteriur vischin che dattan grond sustegn al project.

1971ei la claustra da Mariastein, ch’era vegnida sligiada 1874, puspei vegnida surdada – suenter ina votaziun positiva el cantun Soloturn 1970 – al convent. Interessant ei che quella claustra ei vegnida returnada gia 1971, dil temps ch’il scamond da rearver claustras sligiadas si (art. 52 dalla Constituziun federala), era aunc en vigur. Pér 1973 ei quei artechel confessiunal (anticatolic) vegnius eliminaus dalla Constituziun federala tras ina votaziun dil pievel svizzer.