Sera da Nadal a Breil

… uuu uh uh uuu tunavan bialas e finas vuschs atras las vias da Breil. La gievgia sera, ils 19 da december 2019 han la scoletta e l’1.–4. classa da Breil envidau geniturs e fargliuns, parents ed enconuschents ad ina sera da Nadal. En quater quatiers dil vitg ei massa glieud serimnada sper ina biala steila. Ils affons ein vegni a cantond cun lur scolastas e lur scolast el liug. Els purtavan ordavon ina latiarna e mintgin veva ina glisch enta maun.

Leu han els cantau ina biala canzun dalla candeila che glischa. Denteren han treis affons prelegiu ina historia da Nadal: Lumina, ina buobetta ch’era alla tscherca dalla glisch.

Cun grond tschaffen han ils affons repartiu suenter la glisch a tuts. Cun in til da glischs ein tut las gruppas serendidas enviers il plaz cadruvi. Da tuttas scheinas vegnevan massa glischs che sclarevan il stgir. Sil plaz cadruvi han tut ils affons cantau ensemen bellezia canzuns da Nadal. Cul bi pégn illuminau avon baselgia ha quei dau in’atmosfera tut speciala. Tuts han tedlau cun cor aviert las bialas canzuns da Nadal, accumpignadas dil clavazin: O glischa ti candeila, Zünd ein Licht an, Tu scendi dalle stelle e Dimri, ina fetg biala canzun. Ils affons vevan grond plascher da cantar e lur egls tarlischavan sco marenghins. In grond cumpliment als affons per quei bellezia e grondius cant.

Suenter han els repartiu punsch e vin cauld. En cuminonza vein nus gudiu la biala tempra da Nadal.

In grond engraziament a tut las scolastas ed il scolast da Breil per lur engaschi, las bunas ideas e per tut quei ch’els fan culs affons.

Igl ei stau ina bellezia sera da Nadal.

Gabriela Vincenz