Arosa: Aviun pitschen è crudà giu

Ad Arosa è crudà giu ier da mezdi in aviun pitschen datiers da la staziun da muntogna Tschuggen dasper la pista. Tenor indicaziuns da la polizia chantunala han las duas persunas che sa chattavan en l’aviun pudì vegnir salvadas cun blessuras. Ellas èn vegnidas transportadas cun la Rega en l’ospital. Tenor emprimas infurmaziuns na sajan naginas ulteriuras vegnidas blessadas, ha confermà il pledader da la polizia chantunala Markus Walser. La polizia saja vegnida alarmada da pliras persunas ch’han vis la crudada. L’aviun haja sco ch’i para empruvà da far in atterament d’urgenza e saja lura crudà giu. La raschun per la disgrazia n’è anc betg clera.

Quella vegn ussa sclerida dal post per l’examinaziun da segirezza Sust e da la Procura publica grischuna.