Il humor d’in Grischun

(fmr/hh) Dapresent ei il cabarettist Rolf Schmid sin turnea cun siu program «No10». Quel presenta el proximamein era a Mustér. La primavera 2012 ei Rolf Schmid sepresentaus a Mustér. Suenter ina pausa creativa haveva el scaffiu il program «Absolut Rolf». Entochen lezza ga en halla Cons a Mustér havevan varga 60 000 persunas viu ed udiu quei program, denter auter culla scena «i mag eifach nöma». A Mustér ha el giu fascinau il publicum cun in grondius program. Il cabarettist ch’habitescha a Cuera e ch’ha empriu oriundamein da pasterner sepresenta dapi onns alla tribuna e dapi igl onn vargau fa el quei cun siu dieschavel program ch’el numna lu era «No10».

Danovamein 
a Mustér

Cun siu program niev ei Schmid sepresentaus gia en differents loghens dalla Svizra, denter auter era en marcaus gronds. Suenter ina presentaziun denter Nadal e Daniev a Falera sepresenta el ussa danovamein en halla Cons a Mustér. Il program «No10» ei aschidadir quel per siu giubileum da 25 onns sin tribuna. Igl ei il dieschavel program – «Das isch s’Zehni!». Sch’ins enconuscha intechet il cabarettist grischun san ins ch’el ha danovamein mulau cun diligenza vid il program entochen che quel ei staus dil cuntegn e dalla coreografia aschia sco quei ch’el ha vuliu. En quel dat Schmid danovamein entgins accents. Responsabla persuenter ei buc il davos era l’actura e regissura Bettina Dieterle ch’ei s’engaschada ella reschia e l’inscenaziun da «No10».

Historias ed anecdotas

Era en siu dieschavel program resta Schmid fideivels a ses principis. Igl ei aschidadir in cabaret classic dad el cumbinaus cun ina presa «standup-comedy» sco era biaras historias ed anecdotas ord la veta dil mintgadi. El program da giubileum dat ei denton era in seveser cun enconuschentas figuras da cult. Il motociclist Willy (nochama Wiili will dr Willi nomol a Wiili) anfla puspei siu tschurvi ella patologia e s’entaupa cul sepulider, il commerciant da ferradira schenau Bruno tracta si’allergia da sgugialar cun ina tinctura speciala ed in plevon fa in priedi ch’ei da rir da schluppar. Schmid fa denton era giugs cun patratgs, sgnoccas e giugs cun plaids al cunfin dalla cumedia ed il humor ner, denter nonsens e genialitad. Danovamein interpretescha el a moda fetg originala differentas figuras. Il program «No10» ei danovamein in divertiment ch’ins sto semplamein guder e che fa plascher. Igl arranschament cun Rolf Schmid a Mustér vegn organisaus da La Culturella.

«No10» cun Rolf Schmid venderdis, ils 17 da schaner 2020 allas 20.00 en halla Cons a Mustér. Prevendita: Papetaria Libraria Andrea a Mustér.