Mansteranza appellescha a la politica

(fmr/fa) Ils bundant 200 commembers da la Società da commerzi e mansteranza Engiadina Bassa fuorman üna rait da mansterans e commerciants da Zernez fin Samignun. Ella cumainza l’on da gestiun cun seis aperitiv da Büman. Il local da cultura dal Bogn Engiadina Scuol d’eira in mardi saira bain occupà cun commembras e commembers da la SCM regiunala. «Il müdamaint da l’on es ün bun mumaint per verer che chi’d es i bain dürant l’on scuors ed ingio cha quai nun es stat il cas», ha salüdà Richard à Porta als preschaints chi rapreschantaivan da tuot las branschas economicas da l’Engiadina Bassa. Chi haja dat i’ls ultims ons gronds müdamaints in differents reguards, ha cuntinuà il president da la SCM, «da maniera chi’d es necessari dad esser svessa activs, impustüt da’s confruntar cun nouvas ledschas e tour part a las votumaziuns.» Cha’ls commerciants e mansterans sajan dependents chi nu gnian miss pals administrativs e bürocratics illas roudas. «Be uschea ans pudaina adattar a las nouvas situaziuns o amo meglder da tillas preverer e’ns preparar per ellas.» Richard à Porta ha manzunà la digitalisaziun e dit cha mincha firma ed impraisa dessa stübgiar co ch’ellas pudessan trar a nüz quellas tecnologias nouvas. «Güsta pellas regiuns periferas pon ellas esser da grond avantag.» A las politicras e’ls politikers d’Engiadina Bassa ha il president da la SCM giavüschà da s’ingaschar per ledschas chi pussibilteschan process efficiaints sainza gronda bürocrazia.