L’istorgia cuntinuescha

Da Nicolo Bass / PL

Vairamaing esa fich simpel: Ubain as decida da comunicher in detagl, o lura as decida da nu comunicher auncha al public. In quist cas füss il protocol da la tschanteda da suprastanza cumünela da 
S-chanf dals 11 december, publicho als 27 december, sto vaira cuort: «La suprastanza cumünela da S-chanf es gnida infurmeda…, ed ho decis da nun infurmer in detagl, per cha’ls fats paun gnir sclerieus sainza influenza. Punct.»

Però in quist protocol vain do fö dal tuot il stram. A vegnan dos tschegns e sternieus dubis. Las supposiziuns e famas haun via libra. Uschè as po auncha lönch fer valair cha vela la supposiziun d’innocenza. Quist möd d’infurmer nun es professiunel ed insomma na cunvgnaivel per sclerir la chosa. Cun comunicher in quista fuorma vain fat dan a tuot ils pertuchos. Pcho.

Vairamaing vess la vschinauncha da S-chanf las megldras premissas per üna via cuntainta e pachifica sainza grands pissers. Bunas finanzas tres entradas da fits d’ova, üna scoula, famiglias cun iffaunts, colliaziuns cul trafic public… Che mê as voul dapü? La situaziun cul cas da la resgia da S-chanf muossa però eir las difficultats d’üna vschinauncha pitschna. Minchün es paraint cun minchün e minchün es intretscho dapertuot. Per que chi pertuocha la resgia da S-chanf stuvessan almain quatter commembers da la suprastanza cumünela nouva piglier s-chüsa.

Que voul dir cha la suprastanza cumünela nun es pel mumaint abla da decider cu proseguir cul cas. Ingün nu so propcha cu ir inavaunt. Eir scha l’Engiadin’Ota nu voul auncha savair nouvas da fusiuns demuossa il cas da S-chanf cha’l tema es uschè actuel scu auncha mê. Pel mumaint es l’unica cuntschainta, cha l’istorgia cuntinuescha.