In cumià per 
Duri Campell

(fmr/mc) Al Plantahof a Landquart ha la Partida burgais-democratica (pbd) dal Grischun prendì cumià – a sia delegada – da ses anteriur cusseglier naziunal Duri Campell. La pbd è bain anc adina in pau schoccada da la perdita da ses unic mandat en il parlament federal. Tuttina guardia ella dentant cun curaschì e perseveranza en l’avegnir, ha accentuà il parsura Beno Niggli a la delegada da venderdi passà a Landquart. Ueli Bleiker ha lura renconuschì ils merits da l’anteriur cusseglier naziunal Duri Campell (56) ed ha engrazià per ses grond engaschament politic a favur da la partida.

Duri Campell da Cinous-chel è stà capo communal da S-chanf e nov onns deputà al cussegl grond ch’el ha presidià 2016. Dal 2015 enfin 2019 ha il politicher da la pbd appartegnì al cussegl naziunal. A las elecziuns naziunalas da quest atun passà ha el vulì sa metter a disposiziun per ina proxima legislatura, n’è però betg vegnì reelegì. Campell ha engrazià a sia partida ch’haja pussibilità ad in pur da muntogna e magister da skis ina carriera politica sin plaun chantunal e naziunal.

pagina 2