Success pil project 
«roda-mulin»

(fmr/abc) Il bike, cunzun il velo electric, s’auda tier las attracziuns ellas muntognas. A Morissen san ins cargar quel naven dad uonn cun agid d’ina roda-mulin. «Roda-mulin, ti roda-mulin, vas ad in cuntin. Molas bi segal, e molas salin». Quella canzun populara han biars Sursilvans ell’ureglia. A Castrisch dev’ei dus, il mulin sura ed il mulin sut, a Lumbrein, Laax, a Siat e numerus auters loghens dev’ei menaschis. Tgi ch’arriva a Morissen frunta giudem il vitg sil baghetg cull’ustria nova el mulin ch’ei aunc en funcziun. El local nua ch’ins gauda in bien past san ins mirar, tras ina finiastra el plantschiu, nua ch’il muliner elaborescha il garnezi, ins vesa co frina e crestgas setschentan els sacs. Entochen oz muncava denton la roda-mulin ora el liber. Igl atun vargau ha la gestiunaria digl implont, la Mulin SA, lantschau il project d’ina dretga roda-mulin da lenn che trai a nez l’aua digl ual. L’aua va sur la roda, ina turbina e generatur, l’energia producida vegn transferida en ina staziun da cargar velos electrics. Suenter paucs meters cuora l’aua anavos egl ual. Sco quei che Ueli Caduff, commember dil cussegl d’administraziun dalla societad, confirma ei l’acziun da rimnar daners pil project stada in grond success. Enteifer paucas jamnas hagien ins retschiert varga 26 000 francs. Entochen oz han 100 donaturs susteniu l’acziun ch’ei aunc buca terminada. La societad sa en scadin cass prender en funcziun la roda-mulin e la staziun da cargar aunc uonn.

Dapli informaziuns mira www.ilmulin.ch