Il prossem chapitel a S-chanf

da Nicolo Bass / Posta Ladina

Il protocol da la suprastanza cumünela publicho als 27 december nu vegn listess na corret. Els haun repondero l’agir da venderdi passo. Da «fake news» discurriva l’anteriur president cumünel da S-chanf, Gian Fadri Largiadèr, in lündeschdi saira cur ch’el ho let ün artichel online da la «Posta Ladina». El ho pretais cha quel vegna alluntano immediat da la pagina d’internet. In quel staiva nempe scrit cha tschinch commembers da la suprastanza cumünela veglia da S-chanf s’hegian distanzios dal protocol publicho als 27 december e ch’els pretendan cha quel vegna corret (vair artichel illa «Posta Ladina» da mardi, ils 14 schner). Il documaint correspundent culla pretaisa dals tschinch anteriurs commembers da la suprastanza cumünela d’eira gnia publicho in venderdi passo. Ils tschinch suprastants vegls deploraivan il fat e vulaivan güstificher l’inter agir. «Eau sun gnieu a savair da quists documaints cur ch’el d’eira fingià publicho», declera Largiadèr sün dumanda. El pretenda cha las pretaisas dals tschinch commembers da la suprastanza cumünela veglia, chi sun gnidas fattas in quist nouv documaint publicho in venderdi, nu correspuondan a la vardet. Scu cha Largiadèr declera hegian ils suprastants gieu la pussibilited da consulter il rapport da l’examinaziun e tuot la documainta correspundenta culla udientscha leghela dals pertuchos e da piglier pusiziun aunz cha’l riassunt dal protocol saja gnieu publicho sülla pagina d’internet da la vschinauncha da S-chanf. E cha la suprastanza cumünela hegia eir trat als 18 december la decisiun da surder il cas a la suprastanza nouva ed a la cumischiun da gestiun nouva.

Il documaint nun es pü online

In lündeschdi zievamezdi nu d’eira quist documaint dals tschinch commembers da la suprastanza veglia pü online. Que ho ün simpel motiv: In dumengia saira haun trais da quels tschinch suprastants, nempe Roman Parli, Mario Mammoliti e Linard Luzi (anteriur suppleant) scrit üna charta arcumandeda a la vschinauncha da S-chanf. In quella scrivan els d’avair repondero la situaziun e cha las pretaisas i’l protocol publicho als 27 december sajan güstas. «Que es steda üna melincletta», infurmescha Parli sün dumanda, «il protocol publicho als 27 december es ün riassunt da püssas tschantedas in november e december e que tuorna cha nus essans gnieus infurmos e vains decis als 18 december da surder il cas a la suprastanza nouva.» Cha minchataunt segia da durmir suravi e da ponderer aunch’üna vouta. Parli conferma eir cha la suprastanza veglia s’hegia inscuntreda quista fin d’eivna aunch’üna vouta per tratter la situaziun.

Lascho influenzer dal president?

«Ils trais suprastants vegls s’haun laschos influenzer dal president cumünel vegl», pretenda Liun Quadri. El e l’anteriur vice-president cumünel Paolo Bernasconi sun restos tar lur managiamaint da venderdi passo. «Nus nu vains gieu la pussibilited da consulter il protocol aunz cha quel saja gnieu publicho e nus restains tar nossas pretaisas», declera Quadri. Ch’el nu chapescha chi’s possa darcho müder l’ideja, disch el cun ün segn in direcziun dals trais ulteriurs suprastants vegls. Quadri e Bernasconi d’eiran in suprastanza fingià aunz cha Gian Fadri Largiadèr es gnieu elet scu president cumünel e Roman Parli, Mario Mammoliti e Linard Luzi illa suprastanza cumünela. La «Posta Ladina» ho contacto eir l’anteriur vice-president cumünel da S-chanf, Paolo Bernasconi, per e-mail e per telefon. El nun ho piglio pusiziun infra temp ütil.

«Eau d’he publicho il documaint scu pretais ed eau d’he darcho alluntano in lündeschdi il documaint scu pretais», quinta il president cumünel actuel, Riet Campell. El es daspö ils 1. schner respunsabel pella vschinauncha da S-chanf e conferma cha la charta suottascritta da Parli, Mammoliti e Luzi saja entreda in lündeschdi tar la vschinauncha. El observa l’agir da la suprastanza veglia sün distanza e fo simplamaing que cha pretendan. A reguard il protocol publicho als 27 december disch Campell cha la suprastanza nouva hegia piglio cugnuschentscha da quelo. Ne dapü, ne damain. Chi nu saja l’incumbenza da la suprastanza nouva d’appruver ün protocol da l’anteriura suprastanza cumünela da S-chanf. Dal cas intuorn la Resgia da S-chanf s’occupa intaunt la procura publica chantunela.