Activists dal clima
vulan marschar fin Tavau

(rtr) L’allianza d’activists dal clima na vul betg sa laschar franar e far ses marsch da protest da trais dis sin l’entir traject da Landquart fin a Tavau. Las autoritads han lubì il marsch sulet fin Claustra.

L’ultima etappa da Claustra fin Tavau na dastgan ils viagiaturs d’enviern e critichers dal FEM betg far a pe. Las autoritads chantunalas han motivà il scumond che la via chantunala sin quest traject servia er sco «giassa da salvament».

Ins veglia er il mardi cuntinuar l’excursiun davent da Claustra e quai sin sendas che na dovrian nagin permis, sco per exempel sendas da viandar, communitgescha l’allianza che sa preschenta sut il num «Strike-WEF».

Il marsch da protest cumenza dumengia a Landquart cun ina manifestaziun locala e duai ir a fin mardi a Tavau cun ina manifestaziun sin la plazza avant la chasa communala. Cun il marsch da radund 40 km vulan ils activists dal clima far attents ils 3000 participants dal Forum mundial d’economia sin lur responsabladad per proteger il clima.

(fmr/mc) Per il 50avel anniversari dal FEM ha la confederaziun lantschà sin sia homepage ina seria d’artitgels che porta il titel rumantsch «Cuminaivel». Questa seria che cumpara mintga di s’occupa d’eveniments istorics, surprendents e mintgatant er ilarics. En sia emprima contribuziun s’occupa «Cuminaivel» da l’attentat da terrur dals 11 da settember 2001 a New York. Quest di han terrorists conduì dus aviuns en il «WorldTrade Center» en il sid da Manhattan. En consequenza da plirs acts da terrorissem da quel onn è il Forum mundial d’economia vegnì transferì da Tavau a New York.