Sommaruga e «La forza da surviver»

DA SUSI ROTHMUND / FMR

La presidenta dalla confederaziun 2020 ei la socialdemocrata da Berna Simonetta Sommaruga. Pigl onn presidial ha Sommaruga eligiu dudisch tocs da musica che stattan per la varietad culturala dalla Svizra. Sin quella figurescha era ina canzun dil cantautur romontsch Pascal Gamboni. Suenter il 2015 exequescha Simonetta Sommaruga il 2020 per la secunda ga quei uffeci. La presidenta dil Departament federal per ambient, traffic, energia e communicaziun (Datec) ei vegnida eligida ils 11 da december 2019 dall’Assamblea federala plenara sco presidenta dalla confederaziun pigl onn 2020. Per siu onn presidial suttastreha Sommaruga la valur dalla collegialitad ella politica e l’impurtonza dalla cultura en ina tiara. Sommaruga ei maridada cugl autur Lukas Hartmann. Siu temps liber passenta ella igl unviern il pli bugen al clavazin e cun leger belletristica, la stad en curtgin ni cun viandar. Silla pagina d’internet dalla Confederaziun svizra anfl’ins lu era «igl onn presidial en tuns» – la musica sco fil tgietschen tras igl onn presidial stat davos la fotografia dil cussegl federal ch’ei in simbol dalla collegialitad politica.

Avrel cun Gamboni

Cultura ei quei che tegn ensemen. En ina tiara plurilingua e cun ina gronda varietad ei cultura chit e rihezia el medem mument. Perquei fuorma la cultura tier Sommaruga, la presidenta dalla confederaziun 2020, in fil tgietschen: «Ils dudisch tocs da musica ch’jeu hai eligiu vegnan ad accumpignar tras igl onn presidial. Els ein simbols da nossa varietad.» L’entschatta dat il toc «A quantum of sun» dalla gruppa Puts Marie da Bienna. Il fevrer ei la musicista Edmée Fleury dil Vad cun sia canzun «Montagne» silla playlist ed il mars va ei vinavon cun Mani Matter e «Ds Lied vo de Bahnhöf». Igl avrel ei lu la musica romontscha da Pascal Gamboni d’udir sin la pagina d’internet dalla confederaziun e mintga meins suonda in’autra gruppa ni musicist. Da Gamboni ha Sommaruga eligiu il toc «La forza da surviver» giu dil disc «Everybody wants the Honey». Sco ella scriva el text accumpignont dalla playlist tunassi il lungatg romontsch gia senza cant sco ina melodia. In punct central politic da siu onn presidial seigi il schurmetg dalla diversitad da plontas ed animals. Perquei astgi ina canzun dil cantautur grischun buca muncar silla playlist.

Tut ei natira

Sco Gamboni declara eis el vegnius contactaus via e-mail d’enzatgi ord il team da Sommaruga. «Jeu hai giu grond plascher e sun secapescha bugen staus dalla partida», seregorda il cantautur tuatschin. El hagi il sentiment ch’ei seigi vegniu fatg bia patratgs tgei musica selecziunar, perquei munti ei ad el fetg bia ch’ina da sias canzuns seigi silla playlist. Mo sa Gamboni era daco che gest sia canzun «La forza da surviver» ei vegnida eligida pil meins avrel? «Igl avrel entscheiva la natira puspei a levar, duront quei temps sent’ins il meglier la forza da surviver. Quella forza ei ina miracla – tut e tuts neschan cun quella – quella meina nus atras la veta – gida nus – fa crescher nus – spendra nus – dat speronza», rispunda Gamboni. Quei vegni ad esser il motiv ch’ei hagien eligiu sia canzun. Per Sommaruga seigi il schurmetg dalla diversitad dalla natira, dalla diversitad dils carstgauns, dalla diversitad da culturas e da lungatgs centrals ed impurtonts. «Ella s’engascha per dar ina vusch a quels che vegnan buc udi e cheu essan nus puspei anavos el rudi dalla forza da surviver», puntuescha il cantautur che conta sur da tut quei ch’el viva: «Per mei ei tut natira – era nus carstgauns.» Sommaruga enconuschi el buca persunalmein, mo sch’el entupassi ella, lu schessi el bugen: «Engraziel per tia lavur.»