Cuppa mundiala a Laax

Dad Augustin Beeli / FMR

Sonda ei la concurrenza Laax Open 2020 ida a fin sil Crap Sogn Gion. Quella s’auda tier la Cuppa mundiala dalla FIS dalla stagiun currenta. Il final ei staus in spitachel ella mesapipa gigantica. L’entir’jamna ha la bialaura dominau ed emitturs da televisiun han mussau bialas impressiuns giu dil Crap Sogn Gion. Duas arenas ein stadas el center: Il parc da segls dalla slopestyle e la pli gronda mesapipa dil mund. Omisdus implonts haveva la gruppa Arena Alva preparau il pli perfetg pusseivel, aschia ch’ils atlets da tut il mund han mo saviu ludar quels. En connex culla stagiun currenta dalla Cuppa mundiala da snowboard ein atletas ed atlets stai l’jamna vargada al Laax Open 2020. La mesapipa da 200 meters lunghezia, pendenza da 18,5 grads e preits da mintgamai siat meters cun inclinaziun dad 86 grads ei ina dallas duas arenas dalla creativitad. L’autra ha ina lunghezia da 550 meters e secumpona da quater segls gronds e dus obstachels.

Il Laax Open s’auda ella scena da snowboard sper ils X-Games ell’America tier ina dallas pli impurtontas e prestigiusas occurrenzas. Gudignar ina medaglia a Laax vala sco distincziun ella carriera d’in atleta u d’ina atlet dad aissa.

Pagina 5