Butia resta 
averta

(fmr/fa) Davo 35 ons ch’Anton Häfner e duonna vaivan manà la butia a Ramosch han els decis da schmetter da far da butiers. In avegnir tilla maina Wanda Hopman.

D’utuon vaiva il furner e butier Anton Häfner comunichà ch’el e sia duonna serran la butia a Ramosch. Ch’el maina inavant be plü la furnaria, vaiva’l dit. Per evitar cha Ramosch perda sia butia cumünala as vaiva fuormada üna gruppa da lavur. Quella vaiva il böt da tscherchar üna soluziun per cha la butia nu stopcha gnir serrada. L’ingaschamaint da la gruppa «Avegnir butia da Ramosch» ha gnü success: Sco ch’ella comunichescha i’l Mas-chalch da Valsot s’haja chattà cun Wanda Hopman üna nouva manadra da la butia. Parallelmaing ha la gruppa da lavur decis da fundar üna società promotura chi sustegna la gestiun, la butia cumünala, cun contribuziuns annualas. Ella dess eir surtour ils cuosts per drizzar aint la butia. Bundant 100 persunas han fingià suottascrit üna decleranza d’intenziun da sustgnair finanzialmaing quist’organisaziun. La società da promoziun da la butia da Ramosch vain fundada in venderdi chi vain a las 20.00 in sala da gimnastica a Ramosch.