Trump ed il rest

Da David Truttmann / FMR

Grond di a Tavau: Ier è stada l’avertura dal 50avel FEM. Ils puncts culminants èn stads l’arrivada ed il pled dal president american Donald Trump. Cumbain ch’el ha mo ludà sasez, sia regenza e ses agen pajais. Tut las cameras èn stadas drizzadas ier sin aviuns e helicopters presidials americans. Uschia ch’ils pleds e messadis dad autras persunalitads èn bunamain svanids or dal focus.

Il fundatur dal FEM, Klaus Schwab, ha engrazià en ses pled d’avertura dal forum a la Svizra per l’ospitalitad durant ils davos 50 onns. Ed el ha gist lantschà sez la tematica centrala da l’inscunter a Tavau: il clima. Era Schwab ha appellà a la cuminanza mundiala da prender serius il cumbat encunter la midada dal clima.

Sommaruga: 
«Il mund arda!»

La presidenta da la confederaziun, Simonetta Sommaruga, ha appellà cun pleds clers e cun ina passascha da film als privels dal stgaudament dal clima. Ella ha mess quel appel sut il chavazzin «Il mund arda», sa referind als fieus en l’Australia. L’activista svedaisa Greta Thunberg ha proponì en dus podiums che l’economia mundiala duaja chalar d’explotar resursas fossilas.

L’avertura dal forum a Tavau è era tema en questa gasetta: Tranter auter vegn rapportà da l’effect positiv dal forum sin l’economia en Surmeir. Er la columna dad oz è deditgada al FEM: Johannes Flury, president da la Lia Rumantscha che abitescha en il Partenz, fa ponderaziuns davart las bleras limusinas ed ils helicopters che passan la Val.

Paginas 2, 8 e 12