Val Medel: Projects
sin rucca e ballucca

(fmr/hh) Ils iniziants dils projects pil svilup regiunal dalla Val Medel han survegniu glisch verda da cantun e confederaziun per cuntinuar cun la lavur en detagl. Ils proxims meins vegnan ad esser decisivs per in project ni l’auter. Il gliendisdis sera ein ils purs dalla regiun vegni orientai a Mustér davart las ideas pertuccont ina cascharia nova, l’engrondaziun dalla mazlaria e sechentaria Pally, indrezs da biogas, organisaziun da marketing e vendita per products regiunals e vitg da jurtas. Las reacziuns ein stadas fetg differentas naven da sceptica entochen acceptanza resalvada. Ils proxims meins duein ils projects vegnir approfundi. En special duei vegnir examinau con gronds ch’igl interess dils purs ei da furnir latg ed animals da maz. Denter auter duei quei succeder cun in questiunari. «Sin fundament dallas rispostas vegnin nus a saver giudicar tgei projects che duein vegnir persequitai vinavon», dil Curdin Giger, responsabel pil ressort perfecziun e projects al Plantahof. Minimum treis projects parzials ston vegnir realisai per vegnir susteni da cantun e confederaziun.

Pagina 3