Crescher e sesviluppar

Dad Augustin Beeli / fmr

Dacuort ha la suprastonza communala da Laax publicau il plan directiv dil territori ch’ella ha elaborau. Igl ei in instrument strategic che pertucca era ils cuolms da Lavanuz. Mintga vischnaunca grischuna sto presentar tochen ils 20 da mars 2020 in mied che muossa co il habitadi duei sesviluppar. Las biaras vischnauncas ella periferia han zonas da baghegiar memia grondas e ston perquei mussar al cantun co ins vul sestellegiar da curreger, zavrar ed – el mender cass – propi decider reducziuns. Quei problem ha la vischnaunnca da Laax buc. Ella ha tschella varianta. Ella ei actualmein limitada damai che zonas da baghegiar ein prest duvradas. Il plan directiv dil territori indichescha en tgei direcziun ch’igl ei pusseivel dad ir arisguard baghegiar. En scadin cass sto la vischnaunca cumprimir sias surfatschas e crescher viers anen. Quei vala denton mo pil spazi da habitar. Per commerci e mistregn duvrass Laax niev terren. Aschia sa era terren ch’ei oz ella zona d’agricultura vegnir en damonda. La suprastonza communala da Laax ponderescha dad arver ils cuolms da Lavanuz sco zona turistica speciala. Il plan preveda d’examinar surfatschas corrispundentas. Per ch’il project d’in sanatori internaziunal per managers cun burnout sappi s’avanzar drov’ei denton in auter instrument da planisaziun.

Pagina 3