«Strusch gì da far ina correctura»

DA GION NUTEGN STGIER / FMR

Per la finiziun dal Forum mundial d’economia ha divisiunari Lucas Caduff envidà las autoritads politicas dal chantun e da la vischnanca Tavau ad in inscunter. Ses schuldads hajan prestà lavur exemplarica. Cuntents cun ses collavuraturs è er Walter Schlegel, il cumandant da la polizia chantunala. Il Forum mundial d’economia 2020 è dapi trais dis istorgia. Tar ina uschè gronda occurrenza internaziunala è la segirezza da gronda muntada, dentant er la collavuraziun cun las instanzas politicas federalas, chantunalas ed er cun la polizia grischuna è indispensabla. Dapi 18 onns è er l’armada svizra ferm involvida en il Forum mundial d’economia, cunzunt cun la lavur per l’infrastructura e cun esser ina fitg buna partenaria da la polizia chantunala sch’i va per la segirtad.

Schuldads motivads

Engaschads en ina moda u l’autra per il Forum mundial d’economia avant, durant ed er suenter l’event internaziunal èn var 3000 schuldads e quai be en il Grischun. Lur servetsch militar prestan quels en la Divisiun territoriala 3 cun il cumandant, divisiunari Lucas Caduff. Sias truppas sajan en spezial fatschentadas cun la construcziun e la demontascha da l’infrastructura per l’occurrenza mundiala, per la protecziun da participants e participantas, la populaziun da Tavau e per la protecziun da singuls objects, ha ditg Caduff. I saja vegnì luvrà serius, cun motivaziun e cun ina buna tenuta, ha menziunà il divisiunari sursilvan. Er ses stab haja prestà mintga di in servetsch professiunal. Caduff ha ditg ch’el n’haja strusch gì da far ina correctura durant ils dis dal Forum mundial d’economia. El n’haja er betg gì da prender influenza sin l’entir decurs dals dis da servetsch. Il divisiunari e cumandant da la Divisiun territoriala 3 ha ditg che contribuì bler a la motivaziun da ses schuldads haja bain er l’ospitalitad generala a Tavau ed er en ils auters lieus nua che las truppas eran staziunadas.

Buna cooperaziun cun Austriacs

En ses pled final ha il Sursilvan er ditg che fidanza, credibilitad, avertezza, transparenza e communicaziun entaifer las instanzas politicas localas, chantunalas, federalas, la polizia ed il militar sajan stadas la basa per ademplir ils blers pensums tenor protocol. Ina buna collavuraziun saja be pussaivla sch’i funcziunia sin plaun uman ed er emoziunal. Sa mussà cuntent è Caduff er da la cooperaziun cun l’armada vischina, quella da l’Austria. Tut en tut dastga el far ina bilantscha fitg positiva e dir che pli gronds problems n’haja el betg gì cun la schuldada ed er betg cun la lavur realisada a favur dal Forum mundial d’economia.

Per Trump avevan nus 
er anc in plan C

Walter Schlegel, il superiur da l’enitra segirezza, fa er ina bilantscha positiva da l’ediziun da giubileum dal Forum mundial d’economia. Il colonel e cumandant da la polizia chantunala ha ludà la collavuraziun fritgaivla cun l’armada ed er cun la sanitad. El saja er stà intgantà da la lavur dals umens che sajan stads responsabels per il schurmetg persunal da Donald Trump, il president american. Durant il Forum mundial d’economia haja ses stab da segirezza adina puspè da reagiar a curta vista ed en pauc mument midar il dispositiv da segirtad, ha menziunà Schlegel. Gist quai saja stà il cas cun sa render Trump da Tavau a Turitg cun l’auto e betg cun l’helicopter. Ultra da quai ha il cumandant da la polizia grischuna ditg che per Trump avevia la polizia schizunt er anc in plan C, dasper ils dus auters A e B. El sez n’haja gì nagin contact cun tut las persunalitads, quai che na saja er betg ses pensum, ha accentuà Schlegel.

Fitg impressiunà

Cusseglier guvernativ Peter Peyer, il schef dal departament da segirezza, sanadad e militar, ha ditg d’esser fitg impressiunà da l’entir’occurrenza internaziunala ed en spezial er da la lavur, la motivaziun e la professiunalitad dal militar, da la polizia e da la sanitad. Il Forum mundial saja stà in bun exempel per ina vicendaivladad positiva tranter la polizia, il militar, la sanitad, las autoritads civilas e promoturs ed adversaris dal Forum mundial d’economia.

Per el ina grond’onur

Landamma Tarzisius Caviezel, er el ha discurrì d’in’occurrenza gartegiada. Las mesiras fatgas tar il concept da traffic, l’introducziun dals bus da shuttle, da cumenzar pli baud cun la construcziun da l’infrastructura ed er da dar al Forum mundial d’economia in meglier maletg sajan sco gia avant in onn sa verifitgadas. Sco landamma da Tavau ed ospitant saja obligaziun da beneventar persunalmain ils visitaders impurtants sco Trump, ha menziunà Caviezel. Da pudair far quel bainvegni saja stà per el ina grond’onur, ha menziunà il president communal da Tavau. El ha lura er ditg d’esser s’entupà cun Greta Thunberg, l’activista dal clima, quai che saja er evident sco bun ospitant.