Analisa d’in roman

Da Hans Huonder / FMR

Dacuort ein las lavurs da matura al gimnasi dalla claustra a Mustér vegnidas presentadas. La FMR presenta quater da quellas en ina seria ils proxims dis. La maturanda Lara Tuor da Mustér ei sefatschentada dil roman «Möchtegern» dalla scribenta Milena Moser. La finamira da sia lavur: Co vegn il scriver litterar presentaus e tgei munta quei en quei roman? Quella damonda ei stada aschidadir il fil tgietschen atras il cudisch. En quei connex ein ils suandonts aspects vegni sut la marella: Il cuntegn, il setting sco era l’expressiun principala e la rolla dalla presentaziun dil cuntegn. Las figuras el roman vegnan caracterisadas en lur biografia, qualitads, cumparsa, motivaziun da scriver e funcziun. Medemamein tematisescha Tuor la posiziun persunala da Milena Moser tiel scriver. Enten involver ils lecturs activamein ella formaziun dil roman emprova la scribenta da sligiar ses pensums, quels dil scriver.

Differenta capientscha 
da litteratura

Suenter haver analisau il roman vegn la maturanda tier la suandonta conclusiun: Cun agid dallas differentas figuras sepresenta il scriver litterar el roman. Ils caracters el roman «Möchtegern» persunificheschan mintgamai differentas capientschas dalla litteratura. Ferton ch’il scriver litterar ei per in ina terapia, less in auter acquistar renconuschientscha per siu scriver. In auter nezegia il scriver pil basegns da realisar sesez.

«Per mintgin ha il scriver in’autra muntada. La constataziun principala dil roman selai resumar en treis plaids: Mintgin sa scriver, independentamein da sia derivonza ni sia classa sociala. Quei corrispunda medemamein alla perschuasiun persunala da Milena Moser», scriva Tuor en sia lavur da matura. En ina moda fetg critica sefatschenta Tuor era dalla damonda con lunsch che la litteratura sa vegnir giudicada sco art. Ella dubeta en quei connex ch’in’ovra litterara sappi vegnir commercialisada per exempel en rama d’ina show da casting. In pensum da scriver formau heterogen per la fin d’in capetel hagi la funcziun da participar activamein il lectur el process da scriver.

Entras la formaziun individuala d’in text duei il plascher da scriver vegnir svegliaus.

Cheutras daventi mintga roman in’ovra d’art aviarta.