Onur per Guido Baselgia

Da Martin Cabalzar / FMR

La regenza ha undrà la lavur culturala cun set Premis da renconuschientscha ed otg Premis da promoziun. Il Premi grischun da cultura 2020 va a Guido Baselgia. Il fotograf oriund da Puntraschigna ch’ha vivì 30 onns a Zug e ch’è s’etabli dapi diesch onns cun ses atelier a Malans è vegnì undrà per si’ovra artistica. Ses maletgs da las muntognas dal Grischun, dal aut nord da l’Europa, da las cuntradas da la Bolivia e dal guaud tropic en l’Ecuador fetschian visiblas las basas da la terra e la vulnerabilitad dal mund. Guido Baselgia vegn taxà sco maister da l’abstracziun e da la reducziun sin l’essenzial. El saja in observader cumpetent da la realitad, in poet da la glisch ed in maister da l’artisanadi e da la tecnica da la fotografia, scriva la regenza. Ils premis vegnan surdads ils 12 da zercladur en il rom d’ina festa a Malans.

Pagina 2