Bal da costums populars

(fmr/bt) La tradiziunala sera da costums da la «Gruppa da costums Valragn», c’â gieu liac la sonda sera, â atratg numerusas amaturas a numerus amaturs digl popular bal da costums da davains las Veiasmalas. A Spleia eni vagnieus divertieus da la bùna veintgegna da saltùnzas a saltùnzs cun egn matg da bals populars, preschantos agl decorativ costum da feasta da la Valragn. Incanto spezialmeing ân ear igls saltùnzs giuvens. La «Gruppa da costums Valragn» e numnadameing la sula uniùn da costums agl Grischùn c’â ànc egn ravugl da sòlt par giuvenils. Plenavànt e’gl vagnieu rapreschanto egna cumegia c’â levanto risadas sfaranadas, mussànd igls sgarbugls caschunos antras la digitalisaziùn d’egn bagn puril. La musica populara da famiglia, la «Lenglerkapella» da Saas an Purtenza, â acumpagnieu stupentameing igls sòlts populars a suainter suno sei pigl bal da la notg libra, ascheia ca saltùnzas a saltùnzs en betga stos da franar segl iral da saltar antoca uras tardas.