«Sco ina bova da crappa»

(ls/fmr) Monumental, expressiv e stravagant – la baselgia da la Sontga Crusch a Cuira (1967–1969) è in vair monolit a l’ur da la chapitala. «La baselgia duai parair sco sche grippa fiss crudada da la muntogna.» L’effect intenziunà da l’architect Walter Maria Förderer (1928–2006) vegn fortifitgà cun la construcziun da betun natiral ch’è suenter la Segunda Guerra mundiala daventà il pli impurtant material da bajegiar. La baselgia da la Sontga Crusch a Cuira tutga tar ils 52 edifizis che la Lia grischuna per la protecziun da la patria preschenta en il decurs da quest onn sut il titel «52 beste Bauten». L’idea è da sensibilisar per edifizis grischuns da valur culturala, bajetgs construids en ils onns 1950–2000.