Ina preit da reiver, ina senda da detgas ed in trail da bike

A sia radunonza generala la fin dall’jamna passada ha la suprastonza da Sumvitg Turissem buca mo tratg bilanza digl onn da fatschenta passau, mobein era presentau ideas per treis interessants projects che duein vegnir realisau igl onn vegnent. Sco quei ch’il president Andy Monn ha detg sin damonda dalla FMR, setracta ei d’ina preit da reiver el grep ad Igniu e buca lunsch naven in mini-trail da bike per in e scadin. Ad Igniu sut Rabius sesanfla gia ina plazza da giug frequentada stediamein. Pils dus projects ein concepts grops avon maun che tematiseschan era las investiziuns. Pertuccont la preit da reiver el grep sto aunc vegnir fatg examinaziuns geologicas. Plinavon preveda Sumvitg Turissem da realisar ina senda da detgas cul num Paul Luziet. L’idea ei d’installar detgas per liung dalla senda da viandar e spassegiar da Sumvitg sur la Cresta entochen Rabius. Pliras detgas duein enrihir quella biala senda e procurar per cuorturiala. «En in proxim pass lein nus presentar quels projects alla vischnaunca da Sumvitg e silsuenter sclarir ils detagls per damondas da baghegiar. Medemamein sto la finanziaziun vegnir reglada», di Andy Monn. Tenor la suprastonza da Sumvitg Turissem setracta ei en quei connex d’attracziuns che van era a prau cullas ideas dil project Salischinas.

In video d’unviern

Suenter che Sumvitg Turissem e Trun Turissem han realisau in film davart las activitads da stad dils dus loghens, ei ussa suandau in davart igl unviern. Alla radunonza generala da Sumvitg Turissem ei quel vegnius presentaus allas commembras ed als commembers. Medemamein ha Sumvitg Turissem ediu ensemen cun Trun Turissem e Surselva Turissem ina carta panoramica che dat ina survesta dallas pusseivladads da viandar e bike da Breil sur Trun entochen Sumvitg. Tier las activitads occurridas igl onn vargau sin intschess dalla vischnaunca da Sumvitg s’auda il Bus alpin. Muort corona ein las frequenzas da quel stadas igl onn vargau pli bassas. Perencunter ein las frequenzas silla loipa denter Trun, Sumvitg e Mustér stadas igl unviern vargau aschi bunas sco aunc mai. En quei connex ha corona giugau ina rolla decisiva, la glieud ha tschercau activitads el liber. Era la pista da scursalar Puzzastg-Surrein ei stada visitada bein. In tschuppel arranschaments han cumpletau igl onn vargau la purschida da Sumvitg Turissem sco per exempel la pusseivladad d’observar la selvaschina, il «Swica Nordic Day» ni era la guida da cultura a S. Benedetg e tiegl apicultur a Rabius.

Dapli pernottaziuns

Dall’entschatta november 2019 entochen ils 31 d’october 2020 ei il diember da pernottaziuns carschius ella vischnaunca da Sumvitg en cumparegliaziun cugl onn avon per 250 sin biebein 7000. Quei ei tuttina in augment da bunamein quater pertschien. Alla radunonza generala ei Andreas Baselgia vegnius reeligius en suprastonza per treis ulteriurs onns. Corsin Gadola ei vegnius reeligius sco revisur da quen. Il diember da commembras e commembers da Sumvitg Turissem ei carschius per siat sin biebein 100. Las commembras ed ils commembers novs ein persunas setratgas neutier.