Ir a suttascriver

Uonn festiveschan mes geniturs lur 35 onn da lètg. 35 onns ei ina cefra enamiez – buca gest nozzas da diamant denton era buca gest nuot. Dacuort havein nus sco famiglia festivau quei tierm cun in bien gentar el ravugl famigliar. Caschun rara da seser ensemen e schar reviver reminiscenzas ed emblidar in amen la truscha.

En quels onns da lur lètg ha mia mumma adina puspei raquintau a nus detegliau e cun ardur davart schenghetgs retscharts dad ondas ed augs, con bienmarcau ch’il menü da nozzas seigi staus da gliez temps en cumparegl cun oz e co els seigien serendi il venderdis avon las nozzas ecclesiasticas dalla sonda «a suttascriver» – pia schidadir las nozzas civilas. Senza igl act avon il stadi civil eran las nozzas dalla sonda en baselgia lu buca pusseivlas ed ein aunc oz buca pusseivlas.

Ussa che jeu, sco in resultat da quella lètg, astgel en mia funcziun sco ufficial civil enzinar mez adina puspei perins survegnan quels raquents in’autra muntada. Ed era las historias ch’ils geniturs han forsa raquintau repetidamein duront la veta paran alla sava dalla vegliadetgna e temps da midada tuttenina pli custeivlas e tuttina buca schi lungurusas.

Schi sempels e cuorts che quei act da suttascriver ils documents che vegneva menaus atras en las stivas dils ufficials civils era, ein buca mo las structuras dils uffecis civils semidadas. Possedeva mintga vitg in agen uffeci ei era quei rugalau oz regiunal – a Glion per la Surselva, a Scuol per la Regiun Engiadina Bassa/Val Müstair, a Cuera per la regiun Plessur etc.

Oz ch’il focus ei per biars (percletg denton buca per tuts) sulettamein sin las nozzas profanas tier ils uffecis civils e forsa aunc suenter ella natira alla riva dad in bi lag, han quellas nozzas survegniu in’autra muntada. In beinvegni cordial, poesias, enzaconts patratgs romantics vegnan dai als spusai sin via – secapescha neutral, senza patratgs politics e religius. Quei che fa la caussa beinduras buca pli sempla. Buca pli sempel la caussa fa era il fatg che la preschientscha da hosps ei (momentan) puspei lubida a las enzinadas. Eran duront corona sulettamein mo spus, spusa e meinaspus presents e l’atmosfera era intima, ruasseivla e digna, ei quei in tec pli grev cun ina sala bein emplenida. Aschia eisi buca da far curvien che buca tut las nozzas ein adina schi romanticas sco ins s’imagina forsa. Tgi vegn memia tard, tgi queta ch’il natel seigi pli interessants ch’il plidau, affons che delecteschan ils presents cun berglem, per numnar entginas caussas che fan suar denteren. 

Quei ch’ei stau ed ei aunc oz necessari ei il gie matrimonial. Senza quel va nuot. Ina constanta ella historia dalla lètg. In cuort plaid cun gronda muntada – pronunziaus avon igl ufficial civil per da dretg. Aschia sundel jeu engrazieivels a mes geniturs per lur gie d’avon 35 onns – aschia che jeu haiel oz la quida dad era prender encunter gies da tut quels che vulan maridar e cheutras viver ina clamada da siemi.