«I dovra ena gronda saveida per tschiffer ena golp cun ena trapla»

Meltger Devonas da Salouf posseda ena pitschna collecziun da traplas d’animals. Las traplas tg’èn passa 300 onns viglias ò el catto tranter oter cun rumager la tgesa da Pader Alexander Lozza a Salouf. 

Gio da mattatsch geva Meltger Devonas gugent a tgatscha. Pi tard ò el er fatg la patenta ed ia la sia veta a tgatscha. Chella passiun ò el do anavant agls sies fegls ed agl beadi. La tgatscha da traplas è pero ensatge tgi nign oter fascheva an vischnanca. «Ia sung sto igl sulet tgi geva a tgatscha cun traplas», dei Meltger Devonas (78) da Salouf.

Tutgier aint las traplas angal cun gants

Siva digl 1968 è Meltger Devonas ia a tgatscha cun traplas. El tschiffava surtot golps, tes, fiergnas, meirs ed utschels. Las traplas amplaniva el cun svantraglia. «Igl migler ègl sto da barsar giu chegl davantor», rachinta Meltger Devonas. Las traplas tutgiva el pero aint angal cun gants, betg tg’igls animals suaravan igl carstgang. Las traplas plazzava el an differents lis. Chellas dallas meirs surtot ainten tgesa. «Da chel taimp lò ègl sto ena massa meirs ainten tot las tgesas, chegl era normal,» dei Meltger Devonas.

La gligna era decisiva cura metter las traplas

La tgatscha da traplas era lubeida da chel taimp digl november anfignen la fegn mars. Las traplas per tschiffer golps etc. plazzava Meltger Devonas ainten l’ava u sot ena punt. Schiglio fiss sto igl prievel tgi las traplas schalavan e funcziunavan betg scu chegl tgi vessan. Las traplas da fier unschiva el cun grass e las amplaniva sessour cun la svantraglia barsada giu. «En per pacas gedas ègl capito tgi en utschel grond è sgulo ainten la trapla an pe d’ena golp», dei Meltger Devonas. «I dovra numnadamaintg ena gronda saveida per eir a tgatscha cun traplas.» El vegia gia la sia veta ena gronda passiun per chella tgossa, ma ossa na faschess el betg ple. La moda e maniera scu tg’igls animals nivan mazzos seia stada brutala. 

Tgatscha da traplas oz

Gio siva da bler onns ègl scumando an Svizra d’eir a tgatscha cun traplas tgi maltrateschan u mazzan animals. Traplas per tschiffer en animal veiv èn lubeidas angal ple aint igl territori abitabel ni tar menaschis purils tgi sa cattan manevel alla vischnanca. E chegl angal sch’igl è, ord muteivs da siertad, betg pussebel da sagettar igls animals cun en’arma. Chellas traplas pon pero neir duvradas angal d’en guardiatgatscha u d’en catscheder tscharnia digl uffezi responsabel. 

Legendas:

Fotos Tanja Jäger