Metamorfosa Andermatt: Dalla maula alla tschitta?

«Nuot ei aschi constant sco il svilup». Cun quella construcziun envidan ils organisaturs dil forum, Roland Zegg e Carmen Heinrich, al program da treis dis ad Andermatt. Quei citat da Heraklit mondi aprau sco nuot auter cul mund turistic actual. Per quei motiv sefatschenta il 30avel forum da temas che preoccupan las pendicularas, la dimora pils hosps e las destinaziuns da turissem en general. «Ils treis dis prendan sut la marella il carschament e la persistenza, la transformaziun e la responsabladad, la e-mobilitad ed ils patratgs davart igl avegnir», constateschan il fundatur dil forum e la menadra da quel. Experts ed interprendiders discuteschan ad Andermatt davart teoria e pratica.

Daco Andermatt?

Ch’ils organisaturs dil forum han eligiu Andermatt sco liug da dieta da quest onn ha in motiv principal. «Andermatt ha giu in grond svilup enteifer paucs onns. En siu exempel lein nus mussar tgei effect ch’in grond investur sa haver sin ina destinaziun», di Lars Prevost, assistent dall’organisaziun dil 30avel Forum da turissem dallas regiuns dallas Alps. Ad Andermatt seigi ei pusseivel da mussar allas participontas ed als participonts dil forum 1:1 quei che seigi vegniu realisau ils davos onns. D’in liug dil militar, mo era da cura, seigi Andermatt sesviluppau ad ina destinaziun cun gronda purschida. «Andermatt ei in liug tut special. Mistic, autentic ed il mument en in svilup extraordinari. Jeu selegrel che nus savein arranschar nies forum pil giubileum da 30 onns en quella destinaziun», di Roland Zegg. Era uonn vegnan varga 200 persunas a separticipar al forum.

Tuccar il puls dil temps

Il forum ei vegnius fundaus avon 30 onns culla finamira da porscher ina plattafuorma da discussiun davart temas che pertuccan en special las pendicularas, mo lu era il turissem e las activitads dil temps liber en general. En quels treis decennis ei il forum staus sin viseta surtut en destinaziuns svizras sco Tavau, Engelberg, Interlaken, Flem-Laax-Falera e Puntraschigna, mo lu era egl exteriur vischinont sco a Zell am See, Ischgl, Innsbruck ni Lech-Zürs. Il program da giubileum d’uonn che stat sut il tetel «Metamorfosa» cumpeglia danovamein in tschuppel referats e discussiuns, mo lu era caschuns d’emprender d’enconuscher la purschida d’Andermatt. In dils interessants temas ei segiramein la damonda «con persistents ei il sport alpin d’unviern». A quella runda da discussiun ein exponents da differentas organisaziuns dalla partida, denter els ils anteriurs skiunzs Bernhard Russi e Franz Julen ni era Raimund Rodewald dalla Fundaziun per la protecziun dalla cuntrada dalla Svizra. Mo lu era il tema specific «Metamorfosa – sesviluppescha Andermatt dalla maula alla tschitta?». Il forum cuoza dad oz gliendisdis entochen mesjamna.