Dis dal plurilinguissem

A chaschun dal Di europeic da las linguas ils 26 da settember organisescha la Confederaziun ils dis dal plurilinguissem per l’administraziun federala ed il parlament svizzer. Ils dis dal plurilinguissem han lieu tranter ils 20 ed ils 24 da settember 2021 e cumpiglian differentas activitads. Igl è la finamira da rinforzar e promover il plurilinguissem svizzer, sco la Confederaziun scriva en ina communicaziun a las medias.

Helvetia Latina e las trais gruppas parlamentaras «Plurilinguitad CH», «Italianità» e «Lingua e cultura rumantscha» envidian las commembras ed ils commembers da las Chombras federalas da s’exprimer ils 22 da settember 2021 in entir di en in’autra lingua naziunala che lur atgna e da tractar las linguas minoritaras rumantsch e talian cun attenziun speziala.

Differentas activitads accumpognan il di, tranter auter ina maisa radunda davart il tema «Langues du pouvoir (linguas da la pussanza)». Sco gia l’onn precedent hajan las parlamentaras ed ils parlamentaris la pussaivladad da frequentar ils 23 da settember 2021 ina lecziun d’introducziun en la lingua e cultura rumantscha, organisada dals Servetschs dal parlament.

L’administraziun federala realisescha dals 20 fin ils 24 da settember 2021 ils dis dal plurilinguissem en coordinaziun cun la delegada federala per la plurilinguitad. Durant quell’emna pon las collavuraturas ed ils collavuraturs da l’administraziun federala prender part da numerusas activitads che envidan da scuvrir, discurrer e sustegnair las linguas da las cuminanzas linguisticas pli pitschnas. Il program da quest onn cumpiglia era dus muments da sensibilisaziun per la lingua e cultura da la Svizra taliana e la Svizra rumantscha. (cdm/fmr)