Il tip: Mangiar charn da selvaschina

Il carstgaun – il chatschader e rimnader. Chatschader è el adina stà. Mo uschia ha el era gì vivonda varianta, er en furma da charn. Oz è la chatscha ina passiun. Necessaria per surviver n’è ella betg e la charn da la selvaschina è daventada ina spezialitad. Ed ella vegn er tractada lasuenter. Pli baud na vegnivan ils buns tocs betg separads. Oz è quai auter. Las meglras parts vegnan nizzegiadas autramain che simplamain per metter en asch. Charn da la selvaschina è in product d’emprima qualitad. Ella è er in product da la regiun. Blera charn da selvaschina vegn dentant er importada.

La pli enconuschenta tra­tga cun charn selvaschina e franc quella en asch, saja dal chamutsch, dal tschierv u dal cha­vriel. La charn vegn conservada en in vasch da glas u cheramica plirs dis ensemen cun aschieu, vin sco er spezarias, agl, tschagulas e tenor gust er autras verduras. Suenter il temp che la charn è stada en aschieu vegn ella brassada e cuschinada sumegliantamain ad in fratem. Las agiuntas inclusiv la sosa d’asch ve­gnan agiuntadas, gist tenor gust vegn la sosa cumplettada cun sang dal portg. La charn cuschinada vegn lura servida cun maruns, bizochels, giabuset u giabus cotschen. Tar la charn servida na mancan dentant er betg giglidras. Recepts exacts pon ins chattar sin paginas d’internet u er en bain inqual cudesch.

Tgi che na po betg far quest sforz da metter en asch la charn po natiralmain er laschar pupragnar cun charn selvaschina en in’ustaria u cumprar quella finida tar il mazler u en stizun. Ina delicatessa da la selvaschina è dentant era l’entrecôte, il filet u er talgias. Tgi che vul cumprar charn da selvaschina da la regiun sto far quai uss.

Di per di dat ina redactura u in redactur da la FMR in tip a lecturas e lecturs – in cussegl u ina recumandaziun, senza impegn e senza garanzia che quel «tip» plaschia alura a tuttas e tuts.