Ün desideri d’iniziants e da cumün

«Pel cumün da Scuol douvra üna soluziun simpla» es l’avis dals iniziants chi han inoltrà l’iniziativa per transparenza e chi’d es gnüda suottascritta da 421 votantas e votants. «Eir la suprastanza cumünala es da l’opiniun chi douvra üna tala ledscha da transparenza», accentuescha Christian Fanzun, il capo da Scuol. In üna charta da lectuors cumparüda in gövgia illa Posta Ladina han iniziants declerà perche chi’s dess sustgnair lur iniziativa. Il prüm chi ha suottascrit quella es Dumeng Bischoff, el abita illa fracziun Scuol. «Il cumün nu renda public il protocol da lur sezzüdas», nomna’l ün exaimpel chi til disturba in connex culla transparenza giavüschada, «eir schi nu vegnan trattas ingünas decisiuns stessast tü sco votant tantüna pudair gnir a savair che chi gira in cumün.» In lündeschdi saira, ils 4 october, tratta la radunanza cumünala lur iniziativa, ma eir la cuntraproposta da la suprastanza cumünala. Dumeng Bischoff declera perche ch’el nu po ir daperüna cun quella.

«Id es sco vulair introdüer üna valuta be per Scuol»

«La ledscha da transparenza chi dà a minchün invista i’ls documaints cumünals exista in tuot la Svizra, be i’ls chantuns Uri e Grischun nun es quella amo sün basa cumünala», constata’l, «ed uossa han eir amo 11 cumüns grischuns introdüt quista ledscha chantunala.» Perquai as dumonda’l schi douvra propcha pel cumün da Scuol üna nouva ledscha cumünala: «Quai füss in circa uschea sco scha no introdüessan be per Scuol üna nouva valuta.» Il capo Christian Fanzun s’ha indreschi pro l’Uffizi chantunal dals cumüns: «Id es uschea cha’ls cumüns ston adattar la ledscha chantunala da transparenza in möd ch’ella s’affà per l’adöver cumünal.» Chi sajan differents puncts chi’s stopcha reglar oter co illa lescha chantunala: «Quai es üna pratica chi vala dapertuot uschea, m’hana dit pro l’uffizi.»

Dumondas ston esser per part in scrit

Dumeng Bischoff manzuna ün oter punct chi til disturba pro la cuntraproposta dal cumün: «Sch’ün schurnalist nu sta a Scuol nu po’l far ingünas retscherchas illa documainta cumünala», disch el, «pel mumaint vaina üna redactura chi abita a Scuol, ma sch’ella schmettess ed ün collega chi sta p.ex. a Zernez less gnir a retscherchar nu pudessa’l far quai.» Eir in quist connex s’ha infuormà Christian Fanzun pro l’uffizi chantual respunsabel: «Ils cumüns han tenor la ledscha chantunala dals cumüns il dovair da dar infuormaziuns. Quai fain no in special cul Mas-chalch», declera’l, «e sch’inchün voul avair invista in documainta schi survain el quella. El sto però far – sco chi’d es reglà eir pro’l chantun – la dumonda in scrit.»

Üna votumaziun consultativa in lündeschdi saira

Implü constata Dumeng Bischoff chi nu saja indichà illa cuntraproposta quant chi saja da pajar schi’s fetscha üna dumonda per survgnir invista. «In nossa ledscha esa defini cha scha la lavur per dar resposta surpassa 100 francs vain la dumonda missa in quint», explichescha il capo, «schi’d es damain sun las infuormaziuns gratuitas.» E chi s’occupa da quistas dumondas? «Nossa cuntraproposta prevezza dad eleger ün gremi chi tratta las dumondas», declera Christian Fanzun e po constatar: «L’uffizi chantunal sustegna nossa varianta cul gremi respunsabel per s’occupar da las dumondas d’invista.» Cha la ledscha chantunala saja adattada pellas structuras chantunalas cun tuot ils uffizis, «i’l cumün invezza esa important chi saja avant man ün gremi chi tratta las dumondas.» In lündeschdi saira, a chaschun da la radunanza cumünala, daja üna votumaziun consultativa davart l’iniziativa e davart la cuntraproposta. Quella serva sco racumandaziun per mans da la votumaziun a l’urna als 28 november 2021.