Biala tschera al pei dil Crap da Flem

Il president dalla Pro Cassons ha beneventau la sonda vargada a Flem 57 commembras e commembers alla 12avla raduonza generala. «La preschientscha alla radunonza generala ei era gia stada pli gronda», ha il president Arno Krucker dau d’entellir a caschun da siu plaid da beinvegni ella halla d’events a Flem. La Pro Cassons dumbra buca meins che 1750 commembers e sponsurs che han alimentau la cassa dall’uniun cun donaziuns e contribu­ziuns da commembradi datier dad in milliun francs. «Nus vegnin ad eruir nua e co impunder quels daners.»

La pendiculara nova ei sin buna via

Che buca tontas persunas sco antruras ein separticipadas alla radunonza ei forsa era d’attribuir al fatg che la finamira statutarica principala dall’uniun ei prest ademplida. E quei malgrad che la nova pendiculara previda naven da Flem en direcziun da Foppa e Segnas tonscha sulet entochen Il Cugn. E buc en­tochen sil Fil da Cassons sco quei che la Pro Cassons garegiava. La nova staziun da cuolm e la staziun veglia sil Fil da Cassons vegnan colligiadas cun ina senda da viandar, ha il president communal da Flem, Martin Hug, dau d’entellir la sonda vargada. «Sin quella senda san ins senz’auter caminar senza suga e pichel.» La finamira d’entscheiver a construir l’emprema etappa dalla pendiculara nova gia igl onn proxim ha il president communal valetau per sportiv, denton realistic. Sco ins ha pudiu endriescher pon sulet duas caussas en­tardar il project. Eventuals retards neuasi da Berna quei che pertucca la lubientscha da construcziun. Ed ina dallas duas protestas inol­tradas viers la planisaziun locala da Flem, quella che pertucca la pendiculara nova.

Dabia laud per vischnaunca ed Arena Alva SA

Las divergenzas denter la Pro Cassons, la vischnaunca da Flem e l’Arena Alva SA ein satradas sco quei ch’ins ha pudiu constatar la sonda vargada. Dalla vart dalla Pro Cassons ha ei dau dabia laud per la vischnaunca da Flem e sia moda da communicar. Mo era il project dalla pendiculara nova, realisada proximamein dalla Cassons SA, ha retschiert bia consentiment dalla uniun. La Cassons SA ei ina interpresa communabla dalla vischnaunca da Flem e dalla Arena Alva SA che vegn ad investar ils proxims onns 75 milliuns francs egl access niev en direcziun da Cassons. «La finanziaziun ei segirada.» En vesta da tonta activitad al pei dil Crap da Flem ei l’uniun Pro Cassons buc mo alla tscherca dad ina nova identificaziun e co e nua impunder igl agen capital. La proposta inoltrada ord il miez dalla radunonza da realisar ­arranschaments a favur da commembras e commembers ha la radunonza refusau. Ella ha fatg quei sin giavisch dalla suprastonza. «Talas activitads corrispundan buc agl intent dalla uniun», ei stau d’udir la sonda a Flem.

Regiuvinar la suprastonza

L’uniun sto anflar in niev presidi e novas suprastontas e suprastonts. Bein han il president Arno Kruckner e ses dus cunsuprastonts schau eleger per in ulteriur onn. «Nus stuein urgent anflar novas e giuvnas forzas che surprendan il tgamun.» Igl appel ei buca sulet vegnius dil president dalla Pro Cassons che ha annunziau da definitiv star la davosa ga a disposiziun, quei vala medemamein per in dils dus cunsuprastonts. Il giavisch dad Arno Krucher ei denton d’augmentar e slargar la suprastonza. Pertuccond nova identificaziun per la Pro Cassons e novs camps d’activitad ha ei dau sustegn neu dil president communal da Flem. Martin Hug ha concediu che la pendiculara da Foppa en­tochen Naraus svanescha. La terrassa dall’ustria da Naraus resta denton. «Cheu ein bunas ideas dumandadas co nezegiar quella terassa.»